amalinks wokungena

Uyakhala Uzulu Ngokubhubha Kuka Fidel Castro


Uzulu wakoBulawayo umanyane lozulu wakwele Cuba ukukhalela ilizwe lelo ngokubhubha kuka Fidel Castro owake waba ngumkhokheli weCuba.

Abanye bancome okwenziwa nguCastro lelizwe lakhe ngesikhathi sempi ele Zimbabwe lisilwa impi yenkululeko kodwa-ke bakhona njalo abathi wafundisa inkokheli yeZimbabwe ukubusa ngocuku.

Bakhulume lokhu ngesikhathi uMongameli Robert Gabriel Mugabe efika kweleCuba ukuyahlanganela labanye emele iZimbabwe.

Umqondisi wenhlanganiso yeMthwakazi Heritage Trust, Mnu. Prince Zwide Khumalo uthi ngempela uCastro wasebenza nzima lomuyi uJoshua Mqabuko Nkomo ukukhulula ilizwe embusweni wabamhlophe.

Umuyi uFidel Castro wasebenza gadalala ukwenzela ukuthi kubelozibuse eZimbabwe.
Umuyi uFidel Castro wasebenza gadalala ukwenzela ukuthi kubelozibuse eZimbabwe.

Ibutho lebandla le Zapu elalibizwa ngokuthi yiZimbabwe African People’s Army (ZIPRA) lalolongwa okumangalisayo ngamasotsha eCuba.

Lokhu kusekelwe nguMnu. Brian Hlongwane, owafundiswa ezemabutho kwele Angola libutho likaCastro, othe ngempela banqoba empini yenkululeko ngenxa kukamuyi.

Wengeze ethi impi yabamba nki sokungene ibutho elalolongwa ngele Cuba.

UMayor wekhansili yakoBulawayo, uMnu. Martin Moyo, laye uthe uCastro bamkhumbula ngalokho akwenzela ilizwe leZimbabwe.

Uthe uCastro bayamhlonipha njalo bayamqakathekisa noma esekhotheme.

Umngcinisihlalo weZapu ezansi yeMaNdebeleni, uMnu. Mathew Sibanda, uthe njengebandla elethola usizo olumangalisayo olwatholakala eCuba ngesikhathi sempi yenkululeko, bayamqakathekisa kakhulu uCastro.

Lathi ilizwe selithole uzibuse, eleCuba laqhubeka liphathisa ngendlela langenhlelo ezehlukeneyo ezinjengokufundisa ababalisi.

XS
SM
MD
LG