Uhulumende weBhilithane usekhuthaze izizalwane zeZimbabwe ezadinga ubuphepheli kodwa zancitshwa amaphepha okuhlala kulelolizwe ukuthi ziphindele zodwa emuva zingakabanjwa ngamandla, kukanti zizaphathiswa ngendleko zokubuyela.
Ugatsha lwezaphakathi kwelizwe leBhilithane olwe Home Office solufake imali engange nkulungwane ezimbili lamakhulu amahlanu yemali yeBhilithane 2500 pounds eyokuthi abangela maphepha okuhlala kulelolizwe ngokusemthethweni bayiphiwe ukuthi bazibuyelele ekhaya. UMnu. Norman Zikhali uthi kakwamukeli lokhu.
UMnu. Charles Ndlovu uthi kungabe sekuguqukeni eZimbabwe njengoba ibandla leZANU PF kuyilo elilokhu libusa.
UMnu. Conte Litshe uthi impilo isigxile eBhilithane njalo kubuhlungu ukuthi oyedwa ongelamaphepha okuhlala kulelolizwe ngokusemthethweni afulayithele umdeni wakhe.
UNkosazana Suku Mackenzie olwela amalungelo abantwana uthi udaba lokubuyiselwa kwabantu eZimbabwe luyamhlukumeza. Ukhuthaza uhulumende weBhilithane ukuthi ahlolisise loludaba.
Banengi abeZimbabwe abacela ukuphephela bancitshwa amaphepha njalo abanye babo bavalelwe kuma detention centres eNgilandi. Uhulumende weBhilithane uthi owala ukuphindela eZimbabwe uzambamba ngamandla ambuyisele engelalutho.
