Umongameli Mokgweetsi Masisi wakweleBotswana uthi ilizwe lakhe liqhubeka lisizwa isisindo sezijeziso zenotho ezetheswa ezinye izizalwane zeZimbabwe ngamazwe angenyakatho kanye lele Melika.
Umongameli Masisi, ekhuluma ngoLwesibili esanda kufika esigodlweni iGaborone evela emhlanganweni womanyano wamazwe abensundu oweAfrican Union, uthi eleBotswana layo selisindwa yizijeziso zenotho ezetheswa eleZimbabwe.
Ephendula imibuzo yentathelizindaba, uMasisi uthi ikakhulu emizini esemngceleni leZimbabwe, kuyazikhanyela ukuthi izijeziso zomnotho sezilimaze kangakanani eleBotswana.
"Hamba ezigabeni ezisemngceleni leZimbabwe, ngakucele leBotswana ufike udingisise ukuthi impumela yezijeziso zomnotho kuyini ebantwini bethu, konke lonhlonzi lwempilo ngakucele leBotswana."
EleBotswana lingamanye amazwe alilunga lenhlanganiso yeSouthern African Development Community (SADC), afuqa ukuthi izijeziso zeZimbabwe zesulwe.
Umongameli Masisi uthi ukwethesa eleZimbabwe izijeziso zomnotho sokufiphaze amathuba abanengi okuphumelela empilweni, okugoqela intsha yeZimbabwe, eyinye yayo eyayingakazalwa ngesikhathi lezi zijeziso zifakwa.
Kodwa, ekhuluma leStudio 7 emalangeni asanda kwedlula, ummeli wakweleMelika eBotswana, umnunzana Craig Cloud ulandule ukuthi izijeziso zomnotho yizo ezidala ukubhidlika komnotho eZimbabwe.
UCloud uthi inkohlakalo ezigabeni ezitshiyeneyo zomnotho, kanye lokungahloniphi umthetho lamalungelo oluntu, kuphakathi kokunye okudala ukubhidlika komnotho weZimbabwe.
"Udaba olukhulunywayo ukuthi izijeziso zomnotho yizo ezidale ukubhidlika komnotho weZimbabwe kanye lowamazwe akumhlubulo weSADC, sisiya eqinsweni, alukholweki."
Uthi eleMelika kalisoze lesule izijeziso zomnotho ngaphandle kokuba eleZimbabwe lingene emfolweni ezigabeni ezifana lokuhlonipha umthetho welizwe, kanye lamalungelo oluntu.
OweZimbabwe ohlala kweleBotswana, umnunzana Mthabisi Dube uthi okuqakathekileyo yikuthi kucatshangelwe inzalo yeZimbabwe eyiyo ebhakane lokuhlupheka okwamanje.
"Okuqakathekileyo yikuthi kufakwe izizalwane zeZimbabwe phambili. Inkinga ingabe ingayisiyo ma sanctions, kungabe kuyindaba ye corruption kanye lokunye. Lawo amazwe angentshonalanga, kumele ayesule ama sanctions, sibone ukuthi kambe kuzasilungela yini eZimbabwe."
Ngaphandle kwamazwe angamalunga womanyano wamazwe angezansi yezwekazi le Africa oweSADC, umanyano owe African Union layo igcizelele emhlanganweni wayo ophele lamuhla, eAddis ababa kweleEthiopia, ukuthi izijeziso zomnotho zeZimbabwe kumele zesulwe.
