EleZimbabwe limanyane lamanye amazwe awezwekazi le Africa ukuqakathekisa kanye lokunanza usuku lwe Africa Day. Kodwa ingcwethi kwezombusazwe zithi eleZimbabwe seliphambukile kunjongo lezinqumo zalolusuku kwezombusazwe kanye lakwezomnotho.
Ilanga le Africa Day ngelokunanza ukubunjwa komanyano we Organization of African Unity, wona osowaguqula ibizo waba yi African Union. Lumanyano wabunjwa ngomnyaka ka 1963 ngenjongo yokulondoloza ukuthula, ukuncedisana ukuzikhulula embusweni wabahuquluzi, ukusebenzelana ndawonye, kanye lokubuswa kuhle kwamazwe awezwekazi le Africa.
Umkhokhela wenhlanganiso yezisebenzi iZimbabwe Congress of Trade Unions-ZCTU uMnu. Lovemore Matombo uthi kwavela kwaphazamiseka ekuqaleni ngoba kwasekulwiwa impi yenkethabebetshabi hatshi ukuthuthukisa ezomnotho welizwe ngemva kokuba sekutholakale uzibuse. Kubika intathelizindaba yeStudio 7 uMavis Gama.
Idale le Pan African Parliament, lona elibunjwe ngo 2004 yi African Union ngelokufeza ezinye injongo zalumanyano.
UMnu. Paul Themba Nyathi owayengomunye wamalunga akuqala alelidale, utshele uSithandekile Mhlanga weStudio 7 ukuthi amazwe awezwekazi le Africa akhathazeka kakhulu ngohlupho oluse Democratic Republic of Congo le Darfur, okwedlula olwe lweZimbabwe.