amalinks wokungena

Breaking News

EleZimbabwe Linanza Ilanga leWorld Water Day Uzulu Ekhala Ngokusilela Kwamanzi


EleZimbabwe limanyane lamanye amazwe emhlabeni jikelele ekunanzeni ilanga leWorld Water Day ngoLwesine uzulu ekhala ngokusilela kwamanzi lokudla okwaneleyo elizweni.

Ilanga leli lahlelwa ngumanyano weUnited Nations ngo1993 ukuthi linanzwe kukhangelwa inhlelo zokutholisa uzulu amanzi eneleyo njalo ahlanzekileyo.

Indikimba yalonyaka ithi: Water and Food Security. Umbiko okulindikimba ngowokuthi ukuze elizweni kube lokudla okwaneleyo, kumele kube lamanzi ayiwo adingakalayo ukuthelela izilimo.

Enanza lelilanga u-Mayor wakoBulawayo uMnu Patrick Thaba Moyo ukhuthaze uzulu ukuthi asebenzise amanzi ngonanzelelo ngoba amadamu engatholanga amanzi amanengi njengoba izulu lonyaka lingananga kuhle.

UMoyo uthe umanisipala wakhe sesenza imizamo yokudonsa amanzi edamu eliseNsiza eMatabeleland South ngoba amadamu idolobho elinatha kuwo eselamanzi amalutshwana.

Inhlanganiso ezizimele zodwa ziphansi komthunzi weNANGO zicele uhulumende ukuthi aphange atsho ukuthi iMatebeleland iqondane lendlala ngenxa yokungani kwezulu ukwenzela ukuthi abantu bathole usizo ngokuphangisa.

Ukuhlaziya loludaba sixhume umqondisi weDabani Trust, okuyinhlanganiso encedisa uzulu ukuthola amanzi, uNkosikazi Joyce Dube, lesakhamuzi seGwanda uMnu Jaston Mazhale.

Ababili laba bathi uhulumende kumele esebenze gadalala atholise uzulu amanzi ukuze udubo lokusilela kokudla, lona osoluleminyaka, luqedwe.

XS
SM
MD
LG