amalinks wokungena

Breaking News

UMongameli Mnangagwa Uzakwethekelela Kwele Botswana Ngeviki Ezayo


UMongameli Emmerson Mnangagwa loMongameli Ian Khama.

UMongameli Emmerson Mnangagwa uzakwethekelela kwele Botswana okwamalanga amabili kusukela ngoLwesibili ngeviki ezayo lapho akhangelelwe ukuphiwa khona inhlonipho yokuthi akhulume edale lephalamende.

Lokhu kuzamenza ukuthi abengumongameli wesithathu ukwenza njalo lokhe ilizwe leBotswana lathola uzibuse.

UMnangagwa uzakwethekelela njalo indawo lapho okulolongwa khona amadayimani ngesikhathi esedolobheni leGaborone.

Ukhangelelwe ukuthi uzahlangana loMongameli Ian Khama leziphathamandla zikahulumende.

Okwamanje, amazwe womabili aseqale umhlangano womnyaka wonke, owe Joint Permanent Commission On Cooperation (JPCC), osungule ngoLwesine eGaborone.

Kukhangelelwe ukuthi amazwe womabili alobe izivumelwano ezithile. Iqula leZimbabwe kumhlangano weJPCC likhokhelwa ngumphathintambo obona ngendaba ezenzakala ngaphandle kwelizwe, uMnu. Sibusiso Moyo.

Umhlangano weJPCC uzaphela ngeSonto, kusele amalanga amabili ukuthi uMnangagwa afike eBotswana.

AbeZimbabwe kwele Botswana, abagoqela uMnu. Aaron Ndlovu, bathi leli lithuba elihle lokuthi kukhulunyiswane ngokunengi ikakhulu ngendaba zokuthi kungavuselelwa njani umumo womnotho.

"Ukuvakatsha kwakhe kutshengisa ukuthi amazwe womabili aqhakathekisa ubudlwelwano bona bobabili. UMnangagwa uzakhuluma edale lephalamende, sikhangelele ukuthi asebenzise lelithuba ukuqinisa ubudlwelano kwezebhizimusi phakathi kwamazwe womabili."

NgoLwesibili ekuseni, umongameli Mnangagwa uzavakatshela endaweni lapho okulolongwa khona amadayimani asanda kwenjiwa, eye Diamond Trading Company, esesigodlweni seGaborone.

UNdlovu uthi ukuyafika kukaMnangagwa enkampanini elolonga amadayimana, kuzancedisa ukuthi iZimbabwe ithole ulwazi olungcono kucele lamadayimana.

"Sikhangele ukuthi ukuvakatshela kwakhe endaweni yamadayimana kuzamnika ulwazi ukuthi kuhamba njani, ngoba eleBotswana lileminyaka leminyaka lisimba njalo lithengisa amadayimana."

Izizalwane zeZimbabwe lokhe zidinga impendulo phezu kwamadayimani ayenjiwa eMarange, kodwa imali eyaphuma khona, ayizange incede uzulu.

Owaye ngumongameli, uMnu. Robert Mugabe, wathi kwanyamalala imali engange $15 billion eyayivele ekuthengisweni kwamadayimani.

Omunye wezizalwane zeZimbabwe, uNkazimulo Sibanda, uthi omongameli bobabili kumele bekhulume langendlela abeZimbabwe abaseBotswana abaphathwa ngayo.

“Ukuvakatsha kukaMnangagwa sikhangelele ukuthi bazakhuluma ngathi esilapha eBotswana, njalo bekhulume ngokuthi umnotho weZimbabwe bangawusukumisa kanjani."

Akukacaci ukuthi umongameli Mnangagwa uzahlangana na labeZimbabwe abahlala eBotswana, kodwa kuzaba lokudla kwantambama phakathi kwakhe lomongameli Khama ngoLwesibili ntambama.

UMnangagwa uza lequla elithe thuthu, elibalisa abaphathintambo abatshiyeneyo, kukanti abakugatsha olubona ngezokudinga ezamabhizimusi, abeZimTrade, bafike eGaborone kuyonale iviki ukuzodinga amathuba obudlelwano leBotswana.

Facebook Forum

XS
SM
MD
LG