Idale lephalamende elimela amazwe ase-Europe selikhuthaze umanyano weEuropean Union ukuthi uqhelise izijeziso zenotho owazethesa amalunga ebandla leZANU PFnjalo uvuselela lezinye ezasezesuliwe.
Idale leEuropean Parliament liphume lesinqumo lesi emhlanganweni eliwenze ngoLwesine lapho eliveze khona ukuthukuthela okukhulu ngokubulawa kwabantu abalitshumi lasikhombisa ngamasotsha lamapholisa kulandela ukukhalala umsebenzi okwakuqoqwe yinhlanganiso yezisebenzi eye Zimbabwe Congress of Trade Unions ngenyanga edluleyo.
Umanyano weEuropean Union uzahlaziya udaba lwezijeziso owazethesa amalunga kahulumende weZANU PF ngoMvulo kumbe ngoLwesibili.
Okwamanje umanyano weEU wesula izijeziso owazethesa abanengi kuluhlu lwawo watshiya uMnu. Robert Mugabe, umkakhe uGrace kanye lenkampani kahulumende eyeZimbabwe Defence Forces kuphela.
Kodwa iphalamende ye EU ithi kumele izijeziso ezesulwayo zivuselelwe, ikakhulu kulabo abaphatheka ekubulaweni, ekudlwengulweni kanye lekuhlukuluzweni kwabantu.
I EU Parliament ithe njalo ifuna bonke ababotshwe ngezizatho zombusazwe bakhululwe. Iqhubeke ngokukhuthaza wonke amabandla ezombusazwe ukuthi alondoloze ukuthula elizweni.
Iphalamende le ikhuthaze njalo uhulumende kamongaeli Emmerson Mnangagwa ukuthi afeze izixwayiso zekomishini eyayikhokhelwa ngowake waba ngumongameli weleSouth Africa uMnu. Gkalema Motlanthe.
Ngakolunye uhlangothi, umongameli Mnanaggwa uhlangane labameli bakwamanye amazwe eZimbabwe ngoLwesine wacela ukuthi bakhuthaze amazwe abo ukuthi asekele eleZimbabwe kumizamo yalo yokuzikhupha enkingeni ekulo.
Ukuhlaziya loludaba uNtungamili Nkomo weStudio 7 uxhume ingcwethi ehlaziya ezombusazwe uMnu. Effie Dlela Ncube.
