Amaqembu omdlalo wenguqu aqede ekuzinga laphezulu engalaneni yemiklomelo kusigaba se Southern Region Soccer League adibana kumncintiswano we Joshua Mqabuko Nkomo Trukumb Top 8 ozaqhutshelwa edolobheni lako Bulawayo kusasa ngoMgqibelo.
Imidlalo yesigaba se quarter – final eyenkezo ye Joshua Mqabuko Nkomo Trukumb Top 8 izadlalelwa enkundleni ezimbili ezibalisa eye White City leye Luveve.
Enkundleni ye White City kuzadlalwa imidlalo eyesibaya sika Group A lapho iqembu le Indlovu Iyanyathela elizadlala khona leqembu le Technosphere ngehola letshumi lambili kuthi emini ngehola lesithathu iqembu le ZPC Hwange lizadlala lele Talen Vision.
Enkundleni ye Luveve kuzadlalwa imidlalo yesibaya sika Group B lapho iqembu le Black Boots elizadlala khona lele Amagagasi ngehola letshumi lambili kuthi emini ngehola lesithathu iqembu le ZRP Bulawayo lizadlala leqembu le Bantu Rovers.
Amaqembu azehluleka ukudlulela phambili ngemva kwemidlalo ye quarter – final azathola amadola angamakhulu amathathu kuthi azaphelelwa ngumphako kusigaba se semi – final azaphiwa amadola angamakhulu ayisikhombisa.
Iqembu elizaphakamisa inkezo ekupheleni komncintiswano lizathola inkulungwane ezimbili lamakhulu amane zamadola aseMelika.
Iqembu elizanqotshwa ku final lizaphiwa inkulungwane eyodwa lamadola angamakhulu amahlanu.
Kolunye udaba olumayelana lomdlalo wenguqu, kulabaqeqetshi abalitshumi lanhlanu abaphutshe izifundo zohlobo lwe Caf B ebeziqhutshelwa edolobheni lako Bulawayo ensukwini ezedluleyo.
Ekhuluma ekufikeni emaphethelweni kwalezi zifundo, omunye wabaqeqetshi abakade bephatheke kuzo uZibonele Ncube oweqembu le Amagagasi uthe ufunde okunengi okuzamphathisa emsebenzini wakhe.
Kunengi esikufundileyo ikakhulu okugoqela imithetho yebhora, ukudla, lendlela okumele sifundise ngayo abadlali bethu.
Ngibona angathi umsebenzi wami usuzaba lula ngoba sengikwazi ukuthi abafana bami ngibaphathe njani ngibalungiselele ukuze ngithi ngisiya ku training sengikwazi okumele kwenzakale.
UNelson Matongorere, uGibson Homela kanye lo Taurai Mangwiro yibo abakade befundisa lababaqeqetshi abagoqela abanye abasebenza kumaqembu adlala ku PSL abafana lo Taku Shariwa oweqembu le Mutare City Rovers kanye lo Try Ncube oweqembu le Bulawayo City.
Sikhangele umdlalo wokugijima: NgeSonto ekuseni kuzaqhutshwa umjaho we Liqour Hub 10km Fun Run wona okhangelelwe ukungenwa ngabadlali abalodumo elizweni le Zimbabwe. Laba ngabagoqela uKelvin Pangiso kanye lo Rutendo Nyahora okuyibo abanqobe nyakenye okungumnyaka okusungulwe ngawo lumncintiswano.
Lumncintiswano uzaqala ngaphandle kwesitolo se Liquor Hub esisesitaladeni uFife Street abadlali bagijime baze bayefika endaweni ye Hindu Community Centre eseKhumalo besebephindela njalo khona esitolo se Liquor Hub lapho umncintiswano ozaphelela khona.