amalinks wokungena

Breaking News

FC Platinum: Sizaphatheka Kumncintiswano weCAF Champions League


Iqembu lesizwe lidlala leqembu le Egypt

Iqembu le FC Platinum lithi lizaphatheka kumncintiswano wokudinga intshantshu zezwekazi lase Africa ngomnyaka ozayo ngemva kokuphakamisa kwalo isicoco se PSL

Iqembu le FC Platinum lithe ngokuphakamisa kwalo isicoco se Castle Lager Premier Soccer League lathola ilungelo elokumela ilizwe le Zimbabwe kumncintiswano wokudinga intshantshu zezwekazi le Africa owe CAF Champions League ngomnyaka ozayo.

Umongameli waleliqembu uGeorge Mawere wethule umbiko esithi bayaludinga usekelo oluvela kumaqembu aseke amela ilizwe kumncintiswano wokudinga intshantshu zezwekazi lase Africa.

Inkulumo kaMawere igcizelela leyo ekhulunywe ngumdlali weFC Platinum uWinston Mhango okhuthaze uzulu olandela umdlalo wenguqu ukuba asekele leliqembu kumkhankaso walo kuzwekazi lase Africa njengoba liyabe selimele ilizwe leZimbabwe.

Kutsho uMhango: “Sikhangelele ukuthi lokhu okwenzakeleyo kuqhubekele phambili loba sesidlala kuChampions League lisisekele loba lingasibo basekeli be FC Platinum. Khathesi akuseyiyo FC Platinum kodwa sekuyi Zimbabwe yikho labasekeli beHighlanders kumbe abe Dynamos siyabanxusa ukuba basisekele kakhulu.”

Umsekeli kamqeqetshi weqembu le FC Platinum uLizwe Sweswe uthi kuzamele balungiselele ngemfanelo ukuze baqhube kuhle kumncintiswano we CAF Champions League ngomnyaka ozayo.

“Kuvele kuyisifiso somqeqetshi wonke ukuphatheka kumncintiswano wokudinga intshantshu zezwekazi leAfrica.

Ngendlela esenza ngakhona kanye labadlali esilabo ngibona angathi singangezelela ngoyedwa loba ababili kodwa ngokubona kwami sizazama ngamandla ethu wonke ukuthi simele ilizwe le Zimbabwe. Kuzamele silungiselele kuhle,” kutsho uSweswe.

Ukuphatheka kumncintiswano wokudinga intshantshu zezwekazi lase Africa kutsho ukuba iqembu le FC Platinum lizabe lixotshanisa impala ezimbili ngomnyaka ozayo okuyinto ephazamise iqembu le CAPS United ukuba livikele isicoco se PSL kodwa umgadli uGift Mbweti uthi balakho ukuphumelela futhi.

“Kukhona futhi okumele sikuthathe. Ngomnyaka ozayo kumele sibambane futhi sithathe njalo isicoco ngoba akumelanga kucine khonapha siphelele khonapha. Kumele sidlale ibhola sithole ezinye izicoco,” kutsho uMbweti.

Iqembu le FC Platinum like laphatheka kumkhankaso wokudinga intshantshu zezwekazi lase Africa ngomnyaka ka 2015 lapho ebelimele ilizwe kumncintiswano we CAF Confederations Cup kodwa liphange laphelelwa ngumphako ngemva kokunqotshwa elikwenziwe ngele Young Africans elase Tanzania kuzinga lakuqala elomncintiswano.

Facebook Forum

XS
SM
MD
LG