amalinks wokungena

Breaking News

Iqembu leFrance Lele Denmark Aqhubekela Esigabeni Esilandelayo Kumncintiswano weWorld Cup


Umdlalo weFrance leDenmark.

Amaqembu omdlalo wenguqu athi ele France lele Denmark asedlulele esigabeni esilandelayo somncintiswano wezizwe zomhlaba ngemva kwemidlalo eyokucina eyesibaya sika Group C edlalwe ngoLwesibili.

Iqembu le France libe ngutshiki lobhanqa lele Denmark kungela elenelise ukulitshayela emambuleni okuyimpumela etsho ukuba ele France yilo eliqede imidlalo yesibaya sika Group C lihlezi phezu kwengalane yemiklomelo lilemiklomelo eyisikhombisa.

Endaweni yesibili kuleqembu le Denmark lona elilemiklomelo emihlanu. Lesisimo sitsho ukuba womabili lawa maqembu yiwo asedlulele phambili kusigaba esilandelayo esomncintiswano njalo azadibana lamaqembu azaphutsha esendaweni ezimbili zaphezulu engalaneni yemiklomelo kusibaya sika Group D.

Kusenjalo, intathelizindaba yezemidlalo uFortune Mbele uthi ukuhle kwazakale ukuba amaqembu azadlala njani ngemva kwemidlalo yezibaya kulakho ukudala inkohlakalo kumidlalo yezizwe zomhlaba.

“Ngibona angathi ukwenziwa koluhlu lokuthi amaqembu azadlala njani umncintiswano uze uyephela kwenza kube lobugwelegwele ngoba ngithe ngibukele umdlalo odlalwe liqembu le Russia lele Uruguay bekungathi iqembu leli lizimisele ukunqotshwa nje likhangelele ukuthi lidlale leqembu elithile kusigaba esilandelayo.

“Umbono wami ngowokuthi kuphinde kuqhutshwe uhlelo olokuba amaqembu azadlala njani ngemva kwemidlalo yezibaya ukuze kungabi lesingundengunde.”

Amaqembu akusibaya sika Group D adlala namhla ntambama njalo iqembu le Iceland lona elilomklomelo owodwa ngemva kwemidlalo emibili lizadibana leqembu le Croatia okuyilo elihlezi phezu kwengalane lilemiklomelo eyisithupha kuthi elinye lamaqembu amele izwekazi lase Africa kulimidlalo ele Nigeria lizadlala lele Argentina.

Abafana be Nigeria balemiklomelo emithathu kuthi ele Argentina lilomklomelo owodwa.

Lesisimo sengalane sitsho ukuba iqembu le Croatia selivele selilalo ilungelo elokuyadlala kusigaba esilandelayo kuthi elizahamba lalo lizaphuma kuloba yiliphi phakathi kwamanye la amathathu kusiya ngokuthi impumela yangoLwesibili izabe imi njani.

Komunye umdlalo wesibaya sika Group C odlalwe namhla iqembu le Peru litshaye ele Australia nge 2 ka nya okuyimpumela etsho ukuba iqembu le Peru yilo eliphutshe imidlalo yesibaya lesi lisendaweni yesithathu lilemiklomelo emithathu njalo ikanti iqembu lase Australia yilo elisemsileni njalo lizaphindela ekhaya lingazange lithole ngitsho lowodwa zwi umklomelo.

Facebook Forum

XS
SM
MD
LG