amalinks wokungena

Breaking News

Bayakhala Abantu Ngokutshadiswa Kwabantwana Abangamankazana Besesebancane


Abantwana bathunga okutshiyeneyo (Photo: VOA)

Usuku lwabantwana abangamankazana lunanzwa lonyaka ngesikhathi inhlanganiso yomhlaba wonke jikelele eyeUnited Nations isithi amankazana afika izigidi ezine – 4 million babhekane lenhlupho ezinengi ezigoqela ukwenda besesebancane.

Inhlanganiso le ithi okuphehla kakhulu inhlupho lezi kulez’insuku ngumkhuhlane weCOVID-19 osobulele abantu ebedlula isigidi emhlabeni wonke jikelele. Ithi abanye abantwana abangamankazana sebebanjwa ngamandla ukuba batshade isikhathi singakafiki okwedlula lokhu obekusenzakala kungakaqhamuki umkhuhlane weCoronavirus.

Intombazana ehlala eHarare, uIvy Shelly Begede, okunhlanganiso eyeYoung Women Christian Association, uthi kumele bavikelwe sonke isikhathi ngabazali lohulumende.

Umsekeli womkhokheli webandla National Constitutional Assembly, uNkosikazi Hingani Mkandla, uyakusekela lokhu.

Banengi abesilisa abasekela ukuvikelwa kwabantwana abangamankazana. Omunye wabo nguMnu. Rejoice Ngwenya, okunhlanganiso ebona ngezomnotho lezombangazwe eyeLiberal Market Solutions, othi kulabanye abantu abakhuthaza ukwenda kwabantwana abangamankazana abangakafiki kusigaba sokubalemuli.

“Umkhuhane weCORONAVIRUS wengeze loluhlupho. Kodwa vele kuyinkinga ngenxa yokholo lwamanga, ubuyanga lemikhuba yesintu egogekileyo. Hayi, namuhla kasithatheni amahawu lemikhonto sinqobe isifo soncindezolo ukuze amankazana abe lelakusasa elihle.”

Uthi kumqoka ukulinganiswa kwamathuba abafana lamankazana.

“Asiqhubekeni sinanza ukulingana kwentombazana labafana. Sifuna khona abafazi babe lezikhundla eziqakathekileyo zombuso lodaba lwezomnotho. Hayi, uhambo lolu maluqale lamhlanje.”

UMnu. Victor Dube, ohlala eBudiriro eHarare, uyakusekela lokhu esithi kumele kulungiswe umthetho onqabela ukwendiswa kwabantwana abangamankazana abasakhulayo.

UDube uthi konke lokhu okubhekane lamantombazana kungalungiswa nxa uhulumende engathuthukisa umnotho welizwe ngefanelo.

Inhlanganiso yeUnited Nations isanda kwethula umbiko wosuku lweInternational Girl Child Day oveza ukuba isilinganiso sokungamatshumi amathathu ekhulwini – 30% sabomama abatsha lamantombazana abaleminyaka engaphansi kwengamatshumi amabili lane balahlekelwa yimiphefumulo ngesikhathi bebeletha.

Udaba Esilethulwe nguMavis Gama
please wait

No media source currently available

0:00 0:03:23 0:00


Facebook Forum

XS
SM
MD
LG