amalinks wokungena

Breaking News

UMugabe Ukhangelelwe Ukuyahlenga Umkakhe 'Otshaye' Intombazana eGoli


UMongameli Robert Mugabe lomkakhe, uGrace Mugabe.

Kulemibiko ethi uMongameli Robert Mugabe ukhangelelwe ukufika kwele South Africa ngesikhathi udaba luka Nkosikazi Grace Mugabe lokutshaya intombazana ayithole ilabantwana bakhe seluphethwe yiwofisi kaMongameli Jacob Zuma logatsha lwezokudlelana lamanye amazwe.

Amapholisa akwele South Africa asephe ubufakazi bokuthi uNkosikazi Mugabe ulokhe ekwele South Africa okuphikisana leminye imibiko ebisithi ubaleke waya eZimbabwe.

Umbiko owethulwe lugatsha lwezamapholisa ngoLwesithathu ukuqinisekisile ukuthi uNkosikazi Mugabe wehlulekile ukuzinikela emapholiseni izolo njengokuthembisa kwakhe.

Lolugatsha luthi uNkosikazi Mugabe uthumele amaqgwetha akhe emapholiseni, esithi njengoba eze kwele South Africa ezobona abantwana kanye lokuzongena umhlangano wenkokheli zeSouthern African Development Community okhona ngempelaviki, uvikelekile ekubotshweni ngecala aletheswayo.

NgoLwesithathu amapholisa ekuseni ethule imibiko yokuthi ugwalo lwecala eletheswa uNkosikazi Mugabe solulungele ukuthi bathole imvumo yegqwetha likahulumende lokuthi ayebotshwa.

Umongameli Robert Mugabe lomkakhe, uGrace Mugabe.
Umongameli Robert Mugabe lomkakhe, uGrace Mugabe.

NgoLwesithathu emini kubuye kwaqhamuka eminye njalo imibiko yokuthi udaba lokubotshwa kukaNkosikazi Mugabe alusekho ezandleni zamapholisa kodwa soluphethwe yiwofisi kaMongameli Zuma logatsha lwezokudlelana kweSouth Africa lamanye amazwe.

Umgcinisihlalo weZimbabwe Community in South Africa, uMnu. Ngqabutho Mabhena, uthi le yindaba esithayanise iziphathamandla ngamakhanda kweleSouth Africa.

“Sizwe kuthiwa nxa umuntu engahambi ngomsebenzi kahulumende welizwe la avela khona ezihambela njengoba lokhu uGrace Mugabe ubekwenza, kuyeneliseka ukuthi abotshwe ajeziswe.”

Lobanje uMongameli Mugabe ubekhangelelwe kweleSouth Africa ngempelaviki esiza emhlanganweni weSADC, kulembiko ethi ukhangelelwe ukufika masinyane kwele South Africa ukuzolungisa udaba lwecala elidalwe ngumkakhe.

AbeZimbabwe bona baqhubekela phambili besola isenzo sikankosikazi Mugabe besithi wenza iZimbabwe ikhangelwe ngelihlo elibi ngabakwele South Africa.

Isizalwane seZimbabwe, uNkosazana Victress Mathuthu, uthi kufanele loludaba lulungiswe kungakonakali okunengi.

“Sibhekane lohlupho lwabesilisa abahlukumeza abesifazana. Ngakho asibhekelanga ukuthi sihlukumezane thina sodwa. Kungasenani ufirst lady kume e abhekane lengalo yomthetho ukuze kube lobulungiswa. Siyaxolisa kuntombazana ohlukunyeziweyo, sixolise lakumdeni wakhe lakuzizalwane zeSouth Africa jikelele.”

Abanyeke besabela ukuthi njengoba sekungathi akasoke abotshwe ngecala leli kungenzeka, abakwele South Africa baziphindisele kwabe Zimbabwe.

UMabhena uthi okuzenza loludaba lube nzima yikuthi kwele South Africa leziphathamandla zikahulumende ziyabotshwa.

“Izizalwane zeSouth Africa zethukile kakhulu ukuthi kanti umamalo ngumama onjani. Siyabona lamabandla aphikisayo athi umamalo kumele abotshwe ngoba yena akalaso isikhundla kuhulumeni waseZimbabwe loba engunkosikazi kamongameli uRobert Mugabe.”

Ingcitshi zithi loludaba nxa lungasangenelwanga ngomongameli bamazwela womabili lungadala ubutha obukhulu phakathi kweZimbabwe leSouth Africa.

Facebook Forum

XS
SM
MD
LG