amalinks wokungena

Ikhansili yeGwanda Ifuna Ukukhuphula Inhlawulo Yokwakha Izindlu


Izakhamizi zilandela ukwethulwa kwebudget.

Umanisipala wedolobho leGwanda usekhuphule inhlawulo yokuvunyelwa ukwakha izindlu lokuthi zihlolwe ngabekhansili.

Lokhu kuphume kuluhlu lokusetshenziswa kwemali yomnyaka ozayo.

Esethula indleko zekhansili zomnyaka ozayo, obona ngezemali, uMnu. Johanne Ncube, uveze ukuthi ikhansili idonse kanzima lonyaka ngenxa yokusilela kwemali kanye lokungami kahle kwezomnotho.

Lobanje imithelo yekhansili eminengi ingakhuphukanga, abakha izindlu kuzamele bazimisele ukukhokha imali yokuhlola izakhiwo ephezulu ngoba yengezwe okwethusayo.

UMnu. Bekezela Maduma Fuzwayo, unobhala jikelele wenhlanganiso yezakhamizi zeGwanda, uthi ikhansili kayilandelanga izifiso zezakhamizi.

"UDirector of finance wayethe akulalutho oluzakhwezwa … nxa sekukhweziwe izinto kangaka ngabo 900% lebudget yakhona ayikanikwa izakhamizi ukuthi siyibone siyivumelane so as far as we are concerned hayi akulanto enjalo ... Akusoze kwenzakale akulazinto ezake zakhweza ngabo 900% izinto zivele zimbi zinje so”.

UKhansila Johanne Ncube wethula ibudget yomnyaka ozayo.
UKhansila Johanne Ncube wethula ibudget yomnyaka ozayo.

​Usomabhizimusi uMisheck Ndlovu uthi izandla zika manisipala zibotshiwe njalo akula okunengi angakwenza nxa umnotho ungahlalisekanga.

"Ibudget ngibona kuyikuthi iqondile ihambelana lesilakho kodwa into ezinengi zimile sibili, yikho nje okutshengisa ukuthi benzile beyekela kuphose kufanane njengayizolo okade kuyikho khona ngaphandle lapho engibone khona kuma inspection fees hayi kuqansile”.

UMnu. Bhekinkosi Nyoni, ophila lobugoga, uveze ukukhathazeka ngokusetshenziswa kwemali esithi bona njengezigoga umanisipala akula abaphathele khona.

“Ibudget yethu le iphumile sibili ngiyizwile. Kusobala ukuthi abakhathali ngathi kakhulu ..."

Esinye njalo isakhamuzi seGwanda, uMnu. Raymond Mauba, uthi umanisipala wenze kahle.

“UMayor utshengisele ukuthi khona ulabantu enhliziyweni yakhe kukhanya engani bakhulume kakhulu nge accommodation into eyinsika kakhulu empilweni yomuntu ukuthi umuntu ngubani lobani kumele athole indawo yokuhlala. Ngizwe bekhuluma langamanzi kukahle loba nje into engani angizwanga bekhuluma ngayo yiminyani eluma abantu ebusuku lemini ukuthi kanti yona bayikhangelela ngaphi”

Abakha izindlu abakade bebhadala amadola amahlanu - $5 - sebezamele bahlawule amadola alitshumi lanhlanu - $15 - ngasigaba sinye ukuze izakhiwo zabo zihlolwe zingcwethi zokwakha.

Kuthi labo abakha indawo zokusebenzela belungisa impahla ezama industry lezitezi sokuzamele bahlawule amatshumi amahlanu amadola - $50- ngesigaba kuthi labo abafuna ukwakha imiduli egombolozela izindlu amadurall abakade bebhadala amatshumi amabili amadollar - $20 - labo sokuzamele bahlawule amatshumi amahlanu amadola.

Ukuthi uzulu ayetshayelwa ihlahla yikhansili sokuzakuba ngamatshumi amane amadola - $40 - isuka kwalitshumi lamadola -$10.

Umanisipala sesungule incwadi aziyibhala lapho indlu eyakhiwayo silungele ukuhlala iOccupation Certificate yona ezakuba yi$50- ukuze umanisipala abambe incwadi zendlu oyakhayo.

Umanisipala weGwanda ubikwa elesikwelede phose izigidi ezilitshumi zamadola - $9,8 million – seZimbabwe National Water Authority le Zimbabwe Revenue Authority kodwa laye ukweledwa izigidi ezedlula ezilitshumi - $13 million - yizakhamizi lengatsha zikahulumende.

Umanisipala uthi ukhangelele ukusebenzisa imali engange $7,7 million kumnyako ozayo njalo eyinye yakhona izasetshenziswa ukwakha isikolo elokitshini leHlalani Kuhle lokugqiba ukwakha itanka lamanzi elokitshini leSpitzko.

Ikhansili ithi kayisoze yesula idola elilodwa elibhadaliswa abaya emawofisini bedinga ubufakazi balapho abahlala khona - amaproof of residence. Incwadi lezi zifunakala kakhulu kulenzinsuku nxa uzulu esiyabhalisa ukuvota.

Facebook Forum

XS
SM
MD
LG