amalinks wokungena

Iqembu leHighlanders Lithi uErol Akbay Sokumele Abophe Ziqine

  • Joseph Njanji

UNhlanhla Dube, umqondisi wenhlelo weqembu leHighlanders FC.

Inkokheli yeqembu le Highlanders ithi alisekho ithuba elokuba umqeqetshi uErol Akbay acatshe ngomunwe nxa iqembu leli lingadlali kuhle njengoba umsekeli wakhe uAmini Soma-Phiri, yena okuthiwe ngu Akbay ubelesandla ekudonseni gadalala kweqembu leli kumidlalo ye PSL, esetshiye umsebenzi.

Umqeqetshi uErol Akbay ngoMvulo ulobele inkokheli yeqembu le Highlanders incwadi esithi imbangela eyokuba iqembu le Bosso lingadlali kuhle yikuba akuzange kuthengwe abadlali abazothatha indawo zabagadli ababalisa uPrince Dube kanye lo Rodreck Mutuma bona asebayadlalela amanye amaqembu kanye lokuthi umsekeli wakhe uSoma-Phiri umudla izithende.

Isiphathamandla seqembu le Highlanders, uNhlanhla Dube, uthi ngemva kokuxoxisana loSoma-Phiri phezu kwaloludaba lumqeqetshi uthethe isinqumo esokuba kungcono ahlehle atshiye umsebenzi ukuze uAkbay aphefumule ngcono.

“Sixoxe loPhiri samazisa ngalokhu sathi katsho elakhe icele wathi yena umsebenzi wakhe uwenza ngenhliziyo ekhululekileyo njengomntwana weqembu le Highlanders kodwa nxa kuyikuthi ubaas wakhe ubona angathi umdonsela edakeni kungcono yena ame eceleni nxa kunguye obephazamisa ukuze aphe umqeqetshi uAkbay ithuba enze lokhu angakwenza ukuze iqembu liphumelele.”

UAkbay ubecele ukuba asebenze loCosmas Tsano Zulu kodwa iqembu likwalile lokhu ngesizatho esokuba uZulu wasuswa esikhundleni ngoba engezwani loSoma-Phiri njalo uMelusi Mabaleka Sibanda nguye ozabe ephathisa ndawonye lo Peter Nkomo ongumqeqetshi wabonozinti.

UDube uqhubekele phambili wathi yena inkokheli yeqembu ikhangelele ukuba kube lenguquko ekudlaleni kweqembu le Highlanders kulandela ukutshiya kuka Soma-Phiri.

“Sikhangelele ukuthi kuzakuba lenguquko nxa kuyikuthi limqotho leli elokuthi bekungela mpumela ngoba bekulokuphazamisana lomsekeli. Sikhangelele ukuthi bazibuthe abafana baziphakamise umqeqetshi wabo athole imiklomelo edingakalayo ngoba akusela isikhathi esokudinga umthakathi khathesi, nxa umthakathi engakatholakali kutsho ukuba logulayo usezaze esifele simphethe.”

Iqembu le Highlanders lizadlala lele Chapungu ngeSonto enkundleni ye White City Stadium emdalweni walo olandelayo kusigaba se Castle Lager Premier Soccer League.

Phambilini kokuyadliwa liqembu le Ngezi Platinum Stars ngempelaviki edluleyo, umqeqetshi uErol Akbay ubephiwe imidlalo emithathu yinkokheli yeqembu eyokuba alungisise isimo kuqembu le Highlanders lona eseliphenduke umthatshuzwa kulezinsuku.

Ukuphosela kwakhe umsekeli wakhe uAmini Soma – Phiri inyoka ephilayo kungabe kumsebenzele ukuba ayale elokhu esemsebenzini okwamanje uAkbay.

Kulakho kodwa ukumlethela amanzi ngomsele engakadlali lomdlalo wesithathu kuleyo abeyiphiwe egoqela owe Ngezi, owangempela viki esiyakuyo le Chapungu kanye lowe Dynamos ngeviki ezayo, ngoba isizatho esokuba akathengelwanga abanye abagadli ekuhambeni kukaMutuma lo Dube silahlelwe khatshana yinkokheli yeqembu yona esithiye ukuba ibone iqiniso elokuba uSoma-Phiri nguye obevoxa.

Facebook Forum

XS
SM
MD
LG