amalinks wokungena

UMadinda Ndlovu Usekhethwe Ukuba Ngumqeqetshi Omutsha weBosso

  • Joseph Njanji

Highlanders technical manager Madinda Nldovu

Iqembu lomdlalo wenguqu ele Highlanders selethule umdlali olodumo uMadinda Ndlovu njengomqeqetshi walo omutsha.

UMadinda uthatha isikhundla esitshiywe yisizalwane selizwe le Holland uErol Akbay njalo uphenduka kuqembu alidlalela waphinda waliqeqetsha evela elizweni le Botswana lapho asebenzele khona amaqembu ambalwa agoqela ele Mochudi Centre Chiefs, ele Township Rollers, kanye lele Orapa United.

Uphakamise isicoco seligi kathathu kwele Botswana, kabili leqembu le Mochudi Centre Chiefs, lakanye leqembu le Township Rollers kodwa usekhumbule ekhaya kuqembu akhulele kulo.

Isiphathamandla seqembu le Highlanders uNhlanhla Dube uthi uMadinda isikhundla sakhe ngesika technical manager okutsho ukuba kukhala esakhe isicathulo kukho konke okumayelana lokudlalwa kwenguqu kuqembu le Bosso.

“Umkhokheli wabaqeqetshi kusukela kumaqembu ethu abasakhulayo kuze kufike kuqembu lethu elidlala kuzinga laphezulu nguMadinda Ndlovu obizwa ngokuthi nguTechnical Manager. Nguye olomlandu wokubumba inhlelo zonke zokuqeqetsha kusuukela kulabo abancane kuze kufike kulabo abaphezulu.”

UMadinda uzaphathiswa nguMandla Mpofu kanye lo Melusi Sibanda kuthi okhangele abadlali nguVezigama Dlodlo ikanti umqeqetshi wabonozinti akakakhethwa.

UMelusi Sibanda nguye njalo umqeqetshi weqembu elaziwa ngegama elithiwa Bosso 90 lona elidlala kusigaba se Southern Region Division One Soccer League ephathiswa ngu Gift Makheyi Lunga kuthi okhangela abadlali nguMarko Tundu Dube.

ULunga nguye njalo oqeqetsha iqembu labasakhulayo abaleminyaka engaphansi kwetshumi lathoba minwe mbili kuthi abaleminyaka engaphansi kwelitshumi lesithupha baqeqetshwa nguSizabantu Khoza ikanti abaleminyaka engaphansi kwelitshumi lane baqeqetshwa nguDaniel Ngwenya kubesekusithi okhangela abadlali nguSmart Moyo.

Odokotela beqembu nguHillary Tshuma kanye lo Loyal Nyika.

UDube uthe uMadinda labanye bakhe sebeqalile amalungiselelo alonyaka njalo ensukwini ezilandelayo bazakwethula uluhlu lwabadlali balo balonyaka.

Abaqeqetshi bamaqembu abasakhulayo bona bazaqhuba uhlelo lokudinga abadlali abatsha ngoMgqibelo eHighlanders Clubhouse.

Facebook Forum

XS
SM
MD
LG