Okhankasela ukuba ngumgcinisihlalo weqembu le Highlanders uKenneth Mhlophe uthembisa ukuthi uzavuselela leliqembu libe yiBosso yakudala nxa engakhethwa kukhetho oluzaqhutshwa ngenyanga ezayo.
UMhlophe uthi isikwelede esibhekane leqembu le Highlanders yiso esimenze wezwa etshiseka ukuba athathe isikhundla sikamgcinisihlalo weqembu le Highlanders ngoba kudingakala umuntu olamaqhinga okuqeda isikwelede lesi esifika phose isigidi samadola.
“Eyinye into eyangenza ngiphakame ngingene kukhetho lokuba ngumgcinisihlalo yisikwelede sonalesi esiyala silokhu sikhula ngoba kungelamizamo eyokusiqeda. Nxa ngilesikwelede sakho esenkulungwane yamadola kumele ngibe lamaqhinga okusiqeda njengokuthi ngingakupha amadola alitshumi ngiyabe sengisele lesikwelede senkulungwane eziyithoba munwe munye lamakhulu ayithoba munwe munye lamadola ayithoba munwe munye.”
UMhlophe uthi nxa kungenzeka ukuba akhethwe ukuba ngumgcinisihlalo omutsha oweqembu le Highlanders uzakhulumisana labo bonke abakweledwa liqembu le Highlanders ukuzwe abonisane labo ngesimo esibhekane leqembu ngoba labo abavele bengabalandeli beqembu beqembu bengaba lozwelo bacine besesula ingxenye yezikwelede.
UMhlophe ngusomabhizinisi ophumelele kakhulu edolobheni lako Bulawayo njalo uthi iqembu le Highlanders lidinga inkokheli elokuhlakanipha kwezamabhizimusi.
“Inkokheli yeqembu le Highlanders esifunakala khathesi ngabantu abalengqondo ekhaliphileyo kwezamabhizimusi. Yebo senza okwebhola kodwa okuqakathekileyo khathesi yikukhalipha kwezamabhizimusi lobukhokheli obuqotho njalo lokhu kungaba khona yonke into iyahlangana.”
UMhlophe uvele uhlezi encedisa iqembu le Highlanders ngosekelo lwemali njalo ubephathisa kakhulu iqembu elidlala kusigaba se Southern Region Soccer League elaziwa ngegama elithiwa Bosso 90 ngoba esithi ukholwa ekutheni iqembu le Highlanders kumele lisebenzise abadlali elizikhulisele bona.
Uqhubekele phambili wathi loba evele ehlezi ephathisa iqembu le Bosso ukuphatheka kwakhe kwezamabhizimusi kumbeka esimeni esihle esokuba etholele iqembu le Highlanders usekelo lwemali kwezinye inhlanganiso.
“Kulenkampani engisebenzisana lawo yikho ke inkokheli zalawo mankampani sesijwayelene kakhulu okokuthi bayambona sengithelekile nje emahofisini abo ngingazange ngiqale ngicele ukubabona njalo yibo labo abantu engithi bazangincedisa.”
Ukhetho lokudinga umgcinisihlalo omutsha oweqembu le Highlanders ndawonye lo nobhala jikelele kanye lelunga lekhomithi luzaqhutshwa ngenyanga kaNhlolanja njalo uMhlophe kukhangelelwe ukuba uzancintisana lo Ernest Maphepha Sibanda yena ongakaphumeli egcekeni ukuba uyasifuna yini lesisikhundla sikamgcinisihlalo.
Abanye abakhankasela izikhundla ngabagoqela uLawrence Phiri kanye lo Nkululeko Ndlovu abafuna ukuba ngunobhala.