Ukususwa kwezinye iziphathamandla zeZanu PF kuluhlu lwezijeziso ezafakwa yinhlanganiso yomanyano wamazwe awe Europe eye European Union akusoze kwenze uMongameli Mugabe lebandla lakhe bekele ukwephula ilungelo loluntu, kutsho inhlanganiso yeHuman Rights Watch.
I European Union izakwazisa ngoLwesihlani amabizo amalunga eZanu PF angamatshumi amahlanu lanye, 51 lamankampani athile esiwesulile kuluhlu lwayo lwezijeziso.
Kodwa uMongameli Mugabe lamanye amalunga alelibandla bazaqhubeka betheswe izijeziso. Lo ngumkhuba i-EU ewenza minyaka yonke selokhu kubunjwe uhulumende womanyano.
Kodwa embikweni ewethule ngoLwesine, iHuman Rights Watch, yona elwela amalungelo oluntu, ithe ukwesula izijeziso lezi kwezinye iziphathamandla kuzanikeza iZanu PF idlabuzane lokuqhubeka ihlukuluza uzulu njalo isephula amalungelo oluntu.
Inhlanganiso le ithi njalo ukwala kwebandla leZanu PF ukuthi kuguqulwe imithetho ethile kutsho ukuthi ukhetho oluzayo alusoze lube ngolukhululekileyo. IZanu PF yona ithi ifuna lezizijeziso zesulwe zonke.
