amalinks wokungena

Breaking News

Amnesty International: Uhulumende weZimbabwe Kaphe AmaLicence Emisakazo


Uphawo lwenhlanganiso yokulondolozwa kwamalungelo oluntu eye Amnesty International

Inhlanganiso yeAmnesty International, elwela amalungelo oluntu emhlabeni jikelele, isiyethule umbiko osola uhulumende weZimbabwe ngokwehluleka ukupha imvumo yokusakaza emisakazweni yezigaba lakuleyo ezimeleyo engalabudlelwano lohulumende kumbe ibandla elibusayo.

Lumbiko olesihloko esithi, ‘Beyond Tokenism’ uveza ukuhlukuluzwa, ukwethuselwa lokubotshwa mahlayana kwalabo abafuna ukuthi imisakazo yezigaba labazimeleyo baphiwe imvumo yokusakaza.

Umbiko wenhlanganiso ye Amnesty International uveza ukuthi eleZimbabwe alikaphi ngitsho lowodwa umsakazo wezigaba imvumo yokusakaza selokhu lithole uzibuse ngo 1980. Okwamanje kulemisakazo yezigaba engamatshumi amabili lasitshiyagalombili (28) emelele ukuphiwa imvumo yokusakaza. Ukuncitshwa imvumo yokusakaza lokhu kwenzeka kungakhathalekile lokuthi umthethe weBroadcasting Services Act of 2001, uthi iBroadcasting Authority of Zimbabwe ibaphe leyo mvumo.

Ukwehluleka kukahulumende ukupha imisakazole yezigaba imvumo yokusakaza sekwenze inengi layo yaqala ukufaka inhlelo kuma CD beseziphiwa umuntu ngamunye ukuze ayelalela esekhaya. Kodwake umnumnzana Kudzai Kwangwari, obona ngokuqhutshwa kwenhlelo zenhlanganiso ye Zimbabwe Association of Community Radio Stations, uthi abenza lokhu labo badliswa imbuya ngoluthi njengoba kuthiwa bephula umthetho wokusakaza.

NgoMbimbitho ka 2013 amapholisa angena emahofisini omsakazo wezigaba koBulawayo oweRadio Dialogue kwathathwa amarediyo okwakufuze aphiwe uzulu, kwathi isiphathandla salo umsakazo umnumnzana Zenzele Ndebele wetheswa amacala angacaciyo.

Ngo Nhlangula ka2014, inhloli zikahulumende, amapholisa kanye lamasotsha angena emahofisini omsakazo wezigaba i Radio Kwelaz eKwekwe kwathathwa amalaptop lamaCD alenhlelo zomphakathi edlula inkulungwane.

Esekhuluma ngodaba lokuthi mhlawumbe bancitshwa imvumo yokusakaza ngoba uhulumende esesabela ukuthi imisakazole izakupha umphakathi ithuba lokumanyana kwezombusazwe, umnumnzana Kwangwari uthi ayikho into embi elizweni elikhululekileyo ukuthi uzulu akhulume ngezombusazwe, lobanje ekufithizela ukuthi imisakazo yezigaba ihlose intuthuko.

Umqondisi weAmnesty International ezansi yezwekazi leAfrica umnumnzana Deprose Muchena uthi kulusizi ukuthi ngemva kweminyaka engamatshumi amathathu lanhlanu iZimbabwe izibusa, lemvumo yokusakaza ephiwe imisakazo elitshumi ezimeleyo iphiwe kuphela kumankampani labantu abalobudlelwano lohulumende kumbe ibandla elibusayo. Uthi lamaqubaquba email afuneka kulabo abadinga imvumo yokusakaza kufanele akhitshwe ukuze ilungelo likazulu lokuthola imbiko lihlonisthwe.

Lumbiko ukhuthaza uhulumende ukuthi alandele isisekelo sombuso esikubeka kucace ukuthi uzulu ulelungelo eligcweleyo lokwethula imibiko lokuthola imibiko kungelamigoqo emenqabela ukwenza lokho.

XS
SM
MD
LG