Kudaba oluzatshiya abalandeli bomdlalo wenguqu bemanzi te ngenjabulo, iqembu leBrazil lizadibana leqembu leZimbabwe Warriors eHarare ngoLwesibili emdlalweni wobungane.
Umeli weBrazil eZimbabwe uMnu Raul de Taunay utshele intathelizindaba eHarare ngoLwesine ukuthi iqembu lelizwe lakhe lizasebenzisa umdlalo lo, ukulungiselela imincintiswano yeWorld Cup eqala kumaviki amabili azayo kweleSouth Africa.
Iqembu leBrazil ngelinye lamaqembu adume ngokudlala ngobuciko obukhulu emhlabeni jikelele njalo selathatha inkezo yeFIFA World Cup kahlanu lokhu yasungulwayo ngo1930.
Umlandeli wenguqu uAlbert Moyo utshele uNtungamili Nkomo weStudio 7 ukuthi ukuza kweBrazil eZimbabwe yinto ejabulisayo kakhulu.
