amalinks wokungena

Breaking News

I-FC Platinum Isihlezi Phezu Kwengalane Yemiklomelo Esigabeni sePSL


Iqembu leFC Platinum
Iqembu leFC Platinum

Iqembu lomdlalo wenguqu ele FC Platinum yilo eselihlezi phezu kwengalane yemiklomelo kusigaba se Castle Lager Premier Soccer League ngemva kwemidlalo yangempelaviki eyedluleyo.

I-FC Platinum ithe ngokunqoba ekwenze iqembu le Bulawayo Chiefs nge 3 ka nya ngoMgqibelo landiza layahlala phezu kwengalane lilemiklomelo engamatshumi amabili lane.

Lesosimo sihle sahlala sinjalo ngemva kokuba iqembu ebelihlezi phezu kwengalane phambilini kwemidlalo yeviki letshumi lambili ele Chicken Inn libe ngutshiki lobhanqa 0 ka 0 leqembu le Triangle ngeSonto.

Ngalokho ke iqembu le Chicken Inn lehle layahlala endaweni yesibili lilemiklomelo engamatshumi amabili lantathu kuthi ele CAPS United lihlezi endaweni yesithathu lalo lilemiklomelo engamatshumi amabili lantathu njalo elibe ngutshiki lobhanqa 3 ka 3 lele TelOne.

Loba nje iqembu le FC Platinum libuyele esiqongweni sengalane yemiklomelo umqeqetshi walo uNorman Mapeza uthi kuzamele adinge abanye abadlali ngoba engasuthiseki ngendlela iqembu lakhe elidlala ngayo.

Iqembu le Highlanders liphakame layahlala endaweni yetshumi lantathu ngemva kokunqoba elikwenze ele Dynamos nge 1 ka nya emdlalweni oqhutshelwe enkundleni ye Barbourfields ngeSonto.
Iqembu leBosso lingene kumidlalo yangempelaviki lihlezi endaweni yesine nxa usuka emsileni wengalane.

Emsileni wengalane lokhu kuhlezi iqembu le Bulawayo Chiefs lona elilemiklomelo eyithoba minwe mbili kuthi endaweni yesibili nxa usuka phansi kuleqembu le Mushowani Stars lona elibe ngutshiki lobhanqa 0 ka 0 lele Hwange.

Iqembu le Yadah lona lihlezi endaweni yesithathu nxa usuka emsileni lilemiklomelo elitshumi lambili loba nje linqobe ele Chapungu nge 2 ka 1 ngoMgqibelo kuthi endaweni yesine nxa usuka phansi kuleqembu le TelOne lalo elilemiklomelo elitshumi lambili.

Kusenjalo imidlalo yesigaba se Castle Lager Premier Soccer League izake ime ukudlalwa okwamaviki amabili alandelayo kudedelwa uzulu ukuba alandele imidlalo ye Africa Cup of Nations njengoba iqembu elimela ilizwe le Zimbabwe lalo lingelinye alamaqembu aphatheka kulumncintiswano ozaqhutshelwa elizweni lase Egypt.

Abafana be Zimbabwe badlale umdlalo wokuzwana amandla leqembu le Tanzania njalo lumdlalo ufike komlindi uyacina lawamaqembu engutshiki lobhanqa 1 ka 1.

please wait

No media source currently available

0:00 0:02:17 0:00
XS
SM
MD
LG