amalinks wokungena

Breaking News

I-Gukurahundi Izohlala Ingenye Yamaphutha YowayenguMongameli Robert Mugabe


UMnu. Robert Mugabe

Umbuqhazwe oweGukurahundi uzohlala ungenye yezahlakalo ezizaqhubeka zingena kumaphutha obukhokheli bowayenguMongameli Robert Mugabe, uzulu weZimbabwe ethi kwakumele akulungisise lokho esaphila, kuxolelwane, kube yinto elungiswa kokuphela.

Lalamuhla lokhu lokhe bebuhlungu labo abaphathwa kubi yilezi zehlakalo, ilizwe lisanda kuthola uzibuse, bedaniswa yikuqholoza kowayengumongameli Mugabe ngesikhathi esaphila, engazihluphi ukululungisisa loludaba ethi ngoba kwakuyisikhathi sokulahlekelwa yhinqondo kwabantu engavumi ukuthi axolise lokuthi imuli zabahlaselwayo zihlawulwe.

Lanxa uhulumende weZanu PF ubehlezi ezihlenga kulokhu kuphosisa kwakhe, ethi zazikhona izizatho zokumisa ukuxokozela ezigabeni ze Mandebeleni leNkabazwe, uzulu owaphathwa kubi yilezi zehlakalo, ethi zazingekho izizatho zokuba kujeziswe umuntu wonke.

Umnumzana Nqobizitha Khumalo, odabuka eSilobela, enkabazwe, ungomunye obuhlungu kakhulu ngenxa yezehlakalo ze Gukurahundi.

Ethi ayemcunula kabi amazwi kaMugabe ngesikhathi esaphila, lapho owayehlezi ethi lesi kwakuyisikhathi sokuhlanya lapho kudingwa ingcazelo yokuba kungani zaba khona lezi zehlakalo zeGukurahundi.

Basazikhumbula mhlophe lezi zehlakalo abahlangana lazo, zokuhlukuluzwa ngabeviyo lebutho ele Fifth Brigade. Omunye walabo bantu kungumnumzana Davie Ndlovu odabuka esigabeni se Tsholotsho.

Lalamuhla lokhu uthi lokhe kumkhathaza akubonayo ngesikhathi seGukurahundi lanxa wayesesengumntwana wesikolo.

Umfundisi Raymond Motsi, ukhokhela ikholitshi elifundisa abafundisi ele Theological College of Zimbabwe. Ngaphandle kokuba uhulumende azivume lezi zehlakalo, kuqhutshwe uhlelo uqobo lokwenza bavezwe labo abenza lokhu, kuxolelwane, leli lizaba lingxeba elingelaphekiyo njengoba umayiqala leyondaba esengasekho.

Lanxa wenza kwaba le khomidhi ebona ngezokukhulumisana ukuze kube lokuthula ngemva kokupholiswa kwamanxeba okubalisa awezehlakalo ze Gukurahundi, umfundisi Motsi uthi kwakungekho ukuzinikela kwakhe uMugabe ukwenza zifezeke lezinhlelo, okwasuka kwethusa yena labanye abehlelwa zingozi ezehlukeneyo babe lokwesaba ukuba kuzophela na loba hatshi.

Abenhlananiso yenkonzo yamaRhoma eye Catholic Commission for Justice and Peace in Zimbabwe ( CCJP ), benza inhlolisiso yabo phezu kwezigigaba zeGukurahundi ezigabeni ezibalisa eMandebeleni laseNkabazwe,

Umbiko wempumela yenhlolisiso le, owe CCJP Report on the 1980’s Disturbances in Matabeleland & Midlands, bayethulela uMugabe ngesikhathi eyinhloko kahulumende, ngenyanga kaMbimbitho ngomnyaka ka1997, kodwa ubikwa engazange azihlupha ngitsho lakancane ukulandela izixwayiso zayo.

Limpumela yenhlolisiso yaveza ukuba lumsindo wavuka ngemva kokuba kutholakale izikhali kweleMandebeleni kwabangela ukubotshwa kweziphathamandla zeviyo lebutho eleZIPRA labalwa impi yenkululeko bengabebandla leZAPU kanye lokuxotshwa kwenkokheli yebandla leli eyayikuhulumende, egoqela omuyi uDr Joshua Mqabuko Nkomo, umnumzana Lookout Masuku, umnumzana Dumiso Dabengwa labanye balelo bandla.

Lokhu kwalandulwa yinkokheli ye PF Zapu ngaleso sikhathi, ukuthi balezikhali ezazifihliwe okwakumele zisetshenziswe ukugenqula umbuso kaMugabe, besithi konke lokho kwakungamanga begconwa kungela bufakazi njalo kwakuyimizamo yokuhlukuluza lokutshabalalisa lelo bandla ukuze kube lombuso webandla linye owe One Party State.

Kodwa uMugabe akazange akulalele lokho, wathumela iqula labakubutho eleFifth Brigade elaphiwa igama lokuthi yiGukurahundi okutsho ukuba ukuyathanyela wonke muntu kulezo zigaba, lokuyahlukumeza uzulu ukuze esabe ukusekela elinye ibandla ngapandle kweZanu.

Umbiko owethulwa ngabenhlanganiso ye CCJP Report on the 1980’s Disturbances in Matabeleland & Midlands uveza ukuba kwabulawa abantu abedlula inkulungwane ezingamatshumi amabili- 20 000 kulumbuqhazwe weGukurahundi.

Kambe njengoba umnini wazo owaziqalayo engasekho, zizolungiswa na kubuza uzulu wemaNdebeleni laseNkabazwe.

please wait

No media source currently available

0:00 0:06:59 0:00

Facebook Forum

XS
SM
MD
LG