amalinks wokungena

Breaking News

I-High Court Ilaya Umsakazo weZBC lamaphephandaba eZimpapers, Ukuthi Angeyameli Icele Ekwethuleni Indaba


Zimbabwe Broadcasting Corporation
Zimbabwe Broadcasting Corporation

Umthethwandaba waphezulu owe High Court, wethule isinqumo esithi umsakazo we Zimbabwe Broadcasting Cooperation (ZBC) lamaphephandaba kahulumende aweZimbabwe Newspapers Group (Zimpapers) kumele batshiyane lomkhuba wokweyamela icele ekusebenzeni kwabo.

Amankampani ezindaba kahulumende la, babikwa benganikanga amanye amabandla ezombusazwe ithuba, besethule indaba ezazisekela ibandla le ZANU PF ngesikhathi sokhetho lwanyakenye lokudinga umongameli, amalunga edale lephalamende lamakhansila.

Ingcitshi kwezombusazwe zithi lokhu kutshengisa ukuba umsakazo oweZBC lamaphephandaba aweZimpapers abalisa oHerald, Chronicle, Sunday News le Sunday Mail kumele balungisise indlela abethula ngayo izindaba ngoba imali abayisebenzisayo ukuqhuba umsebenzi leyeholo ivela kuzulu.

UMnu Sineke Sibanda ngomunye walezi ngcwethi osekela isinqumo seHigh court lesi.

“Asiyinto emangalisayo vele, yinto abakade behlala beyibona bezithulela Kumele ilizwe libuyele ekusebenziseni umthetho”

USibanda uqhubeke ethi kumele umsakazo wesizwe onjenge ZBC ungasetshenziswa libandla linye lezombusazwe ele ZANU PF kuphela, kodwake ethi isinqumo lesi laloba sisihle silakho ukungaguquli okunengi ngoba singasoze silandelwe.

“ Lokhu siyakwazi ukuba yikwenza kwe ZANU PF. Isinqumo lesi, yisinqumo nje esenziweyo kodwa akutsho ukuba sizaguqula okunengi"

Isakhamuzi seHarare uMnu Mlindelwa Mancitshana, yena othi lesi sinqumo siveza ukuba ukhetho lwalungakhululekanga kungakho udaba lolu kumele lulungiswe.

“Kambe nxa ukhetho solulomnyaka lwedlule, kuzathiwani ngale impumela. Lokhu kwakumele kukhulunywe kusaselesikhathi ngoba le ngeyinye yezinto ezazifuze zilungisiswe”.

IHigh Court ithi ngokusebenza ngale indlela amankampani kahulumende womabili ancitshe amathuba abamanye amabandla ithuba lokukhulumisana lozulu bechasisa labo inhlelo.

please wait

No media source currently available

0:00 0:02:39 0:00
XS
SM
MD
LG