Abebandla le MDC-T elikhokhelwa nguNkosazana Thokozani Khupe baxotshe amalunga edale lephalamende aweMDC Alliance, ekhokhelwa nguMnu Nelson Chamisa kulelo dale.
Abalelibandla bathi bakwenza lokhu belandela isinqumo somthethwandaba oweSupreme Court. Ingcwethi zezombusazwe zithi lokhu sokuzakwenza ibandla eliphilikisayo liqhubeke liphela amandla okumelana lebandla elibusayo leZanu PF ephalamende.
Abaxotshiweyo laba bayisitshiyagalolunye ababalisa, oMnu. Amos Chibaya, Happymore Chidziva, Murisi Zwizwayi, Mucharairwa Mugidho, oNkosikazi Nomathemba Ndlovu, Anna Muyambo, Francesca Ncube, Virginia Muradzikwa, loConcilia Majaya.
Loba nje uMnu. Nelson Chamisa wancintisa kukhetho luka 2018 ephansi kweMDC Alliance, umthethwandaba unqume ukuba, iMDC Alliance ngumanyano wamabandla athi iMDC T, iMDC eyayikhokhelwa ngu Mnu Welshman Ncube, iPDP eka Mnu Biti, iTransform Zimbabwe eka Mnu Ngarivhume, iZANU Ndonga, iMulti Christian Democratic Party le Zimbabwe People First.
Lokhu kwenze ukuba uMaKhupe athathe isikhundla sakhe sokukhokhela iMDC- T wahle waxotsha amanye amalunga edale lephalamende. Namhlanje isikhulumeli se MDC T uMnu Khaliphani Phugeni wazise ukuba sokuxotshwe abanye njalo.
“Ama recalls njengoba sisitsho ukuthi umuntu ungabona semsusa edale lephalamende uyabe ekwenze lokhu ngenxa yokuba yingxenye yilenye ibandla”
Uqhubeke esithi bazaxotshwa bonke abasephalamende abasekela uChamisa.
“Silamalanga angamatshumi ayitshiynagamlombili selokhe idale lathi umama uMaKhupe nguye uMongameli we MDCT nxa wena ungazithi ungowe MDC Alliance party uyazixotsha. Okungcono yikuthi ubabuze ukuba bakwenzelani ukuba besiya kumhlangano we MDC Alliance”
Kodwa ingciwethi ecubungula ezombusazwe uMnu Mlindela Mancitshana uthi lokhu kuzabulala ibandla elephikissayo kuphe ibandla le ZANU PF intshukuntshu.
“Okwenzakele namhlanje okuxotshwa kwabe MDC Allaince kulihlazo nxa sikhangele ukuzibusa kwabantu. Ibandla leli libandla elizimeleyo kodwa likhanya selidlelana lebandla le ZANU PF’
Lokhu kusekekelwwe ngu Mnu Mlungisi Dube isakhamuzi seHarare.
“Ukuxotshwa kwalabantu kuyinto edanisayo ngoba abantu ababavotelayo babavotela ngebangaphansi kuka Chamisa. Kutshengisa ukuba izifiso zabanu kazilandelwa e Zimbabwe’