Embikweni awethulele abezindaba kweleSouth Africa, umtshutshisi ozimeleyo enhlanganisweni ye Afriforum umnumnzana Gerrie Nel, uthe lokhu kutsho ukuthi unkosikazi Mugabe uzabotshwa angalugxoba kweleSouth Africa.
"Lokhu yikho okwenzakalayo nxa kukhutshwe iwarrant of arrest. Kodwa ngaphezu kwalokhu sikhangelele ukuthi kuzaqala uhlelo lokucela uhulumende weZimbabwe ukuthi athumele unkosikazi Mugabe ngapha kweleSouth Africa azothonisiswa. Kufanele ngikukholwe ukuthi uhulumebde weZimbabwe uzenza lokhu okufanele akwenze"
Ukukhitshwa kwale incwadi yokuthi unkosikazi Mugabe abotshwe sekwemukelwe ngabanengi kweleSouth Africa.
Isizalwane seZimbabwe umnumnzana Mlungisi Tshabalala uthi lokhu kufanele kube yisifundo esikhulu kunkokheli zonke zeZimbabwe.
"Uyasuka lapho osuka khona abuye ezoganga elizweni labanye abantu. Yikudelela abanye abantu lelizwe lelo lomthetho walelo lizwe. So mina ngithi benze kahle mpela iAfriForum yavuselela la macala yenza ukuthi iwarrant of arrest ibekhona ngoba ukubotshwa kwalo umama kwenza kube yisifundo kwabanye abantu ukuthi abantu besifazana bengahlukunyezwa"
Kodwake esinye isizalwane seZimbabwe umnumnzana Greatman Mkhwebu uyaphikisana lenyathelo lokubopha unkosikazi Mugabe esithi yisenzonje se AfriForum sokufuna ukujezisa umnumnzana Robert Mugabe lemuli yakhe ngokuthathela abamhlophe amapulazi eZimbabwe ngesikhathi esabusa.
"Abayenze kodwa ngibona engathi it’s a waste of time. Akekho umuntu ozovumela ngoba inzondo yakhona baseselayo vele khonaphana kuMugabe ngoba wabathathela amapulazi. So basafuna ukuziphindisela leyanto. Even igovernment angiboni ukuthi ingakwenza ukuthi ibasekele ngalinto yabo leyo. Bazabe belokhu beyanje bebhadala izimali kodwanje yinto eyaphelela emoyeni"
Kodwake unkosazana Mercy Mvundla uthi kufanele wonke umuntu ohlukumeza abesifazana ajeziswe kungakhathalekile ukuthi ngowesilisa kumbe ngowesifazana.
"Injabulo yami mina lapho isekutheni asingavumelini owesifazana ehlukumeza owesifazana ngesizatho sokuthi may be ulamandla ulepower. Nxa kuyikuthi wayezivikela njengoba etsho, kutsho ukuthi iqiniso lizavela. Nxa kuyikuthi lakhona wayemhlukumeza udade, kutsho ukuthi lakhona iqiniso kufanele livele ajeze okumele ajeze".
Unkosikazi Mugabe utshaye unkosazana Engels nyakenye ngesikhathi emfica elamadodana akhe kwenye ihotela eSandton eJohannesburg. Kunsukwana esisanda kwedlula unkosazana Engels uvulele omunye wamadoda kamnumnzana Mugabe icala esithi yena labangane bakhe bayamhlukumeza ngokumlandelela bezama ukuthi kwesulwe icala lokumangalela unina.
