Ibandla elibusayo kweleSouth Africa, ele African National Congress selisolwe ngamabandla aphikisayo kulelolizwe kanye leMDC ngokwethembisa ukuncedisa iZanu PF ukunqoba kukhetho oluzayo.
Umgcinisihlalo weANC uMnu Gwede Mantashe uthembise iZanu PF emhlanganweni wayo ogqitshwe ngoMgqibelo koBulawayo ukuthi ibandla lakhe lizimisele ukuyincedisa ukuze linqobe kukhetho. UMantashe uthi amabandla womabili alobudlelwano obuqinileyo.
Amabandla aphikisayo kweleSouth Africa, athi eleDemocratic Alliance leInkatha Freedom Party asole limbiko kakhulu esithi iANC ayimelanga ithathe uhlangothi kudaba lweZimbabwe ngoba umkhokheli wayo, ongumongameli njalo weSouth Africa uMnu Jacob Zuma engumlamulankunzi kudaba lweZimbabwe.
Umsekeli wesikhulumeli seMDC ekhokhelwa nguMnu Morgan Tsvangirai, uNkosazana Thabitha Khumalo uthi kuyamangalisa njalo kuyadanisa ukuthi iANC ithatha uhlangothi edabeni lweZimbabwe yona isaziwa ukuthi ingumlamulankunzi.
