Amalunga eZanu PF abikwa ekhuthaza uMongameli Mugabe ukuthi ahuge inkokheli yamazwe awezwekazi leAfrica ukuthi ivumelane lombono walelibandla wokuthi kudilizwe uhulumende womanyano ukuze kuyiwe ekhethweni lonyaka.
AbeZanu PF laba bathi uMugabe kumele akhulume lenkokheli yeAfrica emhlanganweni wayo weAfrican Union ozaqhutshelwa edolobheni leAddis Ababa, kweleEthiopia kumaviki amabili alandelayo.
Bathi kumele uMugabe atshele inkokheli yeAfrica le ukuthi uhulumende womanyano kasebenzi kuhle ngakho kumele kuyiwe kukhetho lanxa kungakabi lesisekelo sombuso esitsha.
Abalwa impi yenkululeko njalo besekela ibandla leZanu PF labo bathi uhulumende womanyano kumele adilizwe kuyiwe kukhetho, lokulotshwa kwesisekelo sombuso esitsha kumiswe.
Kodwa isikhulumeli seMDC ekhokhelwa nguMnu Welshman Ncube, uMnu Nhlanhla Dube uthi lokhu ngeke kwenzeke, okungamazwi agcizelelwe yingcwethi kwezombusazwe uMnu Effie Dlela Ncube.
