Isigaba sebandla leZimbabwe People First sakwele South Africa sesibhalele umphathi we University of Fort Hare uMnu. Mvuyo Tom limkhuthaza ukuthi esule isimemo esithunyelwe umongameli Mugabe esomkhosi wokuthakazelela iminyaka elikhulu li university yasungulwa. Umongameli Mugabe owafunda kule i University ukhangelelwe ukuba kulo umkhosi e university ye Fort Hare kusasa.
Ibandla le ZPF lilobele uMnu. Tom lisithi umongameli Mugabe njengomkhokheli welizwe elilabantu abahluphekayo, belamba labantwana abangasafundiyo ngenxa yobuyanga, akufanelanga avunyelwe ukudlalisa imali esiza kulo umkhosi.
Leli bandla lithi kungcono leyo mali isetshenziswe ukubhadalela abantwana besikolo abanye babo asebexotshiwe kuleyo university ngoba kungelamali yokuhlawulela izifundo zabo.
Ibandla le ZPF lithi ngokumema umongameli Mugabe kulo umkhosi, i Fort Hare ikhombisa ukuthi incedisana loMongamelio Mugabe ekutshaphazeni imali kazulu weZimbabwe, ngesikhathi uhulumende esehluleka ukuholisa izisebenzi zakhe lokuthenga imithi ezibhedlela.
Osaphethe isikhundla sobona ngokuqhutshwa kwenhlelo zaleli bandla kweleSouth Africa umnumnzana Lawrence Mavhaire uthi kakwenzeki ukuthi kulilwa ekhaya ubaba eyetholakala eshishinika edilini lakoMakhelwana.
Leli bandla lithi njalo lesi simemo sichaza ukuthi le i university ivumelana lokwephulwa kwamalungelo oluntu eZimbabwe okugoqelqa ukuthunjwa lokubotshwa mahlayana kwalabo abaphikisana lomongameli Mugabe.
Lelibandla likhumbuze i university le ukuthi umongameli Mugabe lo onxusiweyo uyehluleka ukuchazela ilizwe ukuthi ngubani owantshontsha amadola angamabhiliyoni alitshumi lanhlanu ayetholakele ngokuthengiswa kwezenjiwayo.
UMavhaire uthi okweminyaka engamatshumi amathathu lesithupha umongameli Mugabe ebusa, izizalwane zeZimbabwe azikaze ziyithole intokozo. Uthi okuhluphayo yikuthi yena uyithathaphi imali yokuhamba emagiginila yena uhulumende esithi akalamali.
Leli bandle selixwayise i university le ukuthi nxa ingehluleka ukwesula lesi simemo lizaqoqa amalunga alo ukuze ayetshengisela kule i university ngesikhathi kuqhutshwa lo umkhosi.
Kusenjalo ngolweSine ntambama abafundi be universithi ye Fort Hare batshise indlu yokufundela besithi bafuna izikhalazo zabo zokufunda kungelambadalo lokusizwa ngemali yokudla lezinye indingeko zokufunda kwenziwe kungakafiki ilanga lakusasa.
