Abenhlanganiso yeApostolic Christian Council of Zimbabwe (ACCZ) sebemise umkhokheli wabo uArchbishop Johanes Nyamwa Ndanga, ukukhokhela linhlanganiso.
Wetheswa amacala okuphatheka kwezombusazwe, ikakhulu emisebenzini engalunganga okuthiwa ibisenziwa nguNkosikazi Grace Mugabe, umka Mnu. Robert Mugabe, owayengumongameli welizwe leZimbabwe.
Inhlanganiso ye Apostolic Christian Council of Zimbabwe isinike uNdanga amalanga alitshumi lane ukuthi aphendule incwadi abamlobele yona bekhonona ngokungena kwakhe kwezombusazwe.
Bathi wayesekela uNkosikazi Mugabe owayelwisana labakubandla leZanu PF ababengafuni ukuthi uMnu. Emmerson Mnangagwa athathe isikhundla sikaMugabe.
Omunye wenkokheli yenhlanganiso le, uArchbishop Lameck Chitope, uthi bebevele sebelesikhathi behluphana loNdanga ngobukhokheli bakhe obungaqedakaliyo.
UChitope uthi ukumiswa kwakhe umsebenzi kungezelelwe yizehlakalo zange ‘Super Sunday’ mhlaka 5 ngoLwezi, lapho uNkosikazi Mugabe angena khona umhlangano labamabandla ezokholo lwesiphostoli laba, kwathukwa inkokheli ye Zanu PF eyayisekela uMnangagwa.
Abakhulumisane lomsakazo weVOA Studio 7 ngales’isehlakalo sokumiswa kuka Ndanga kusikhundla sakhe sobukhokheli, okubalisa uMduduzi Mahlangu, bathe ukuxotshwa kwakhe kunuka santungwana.
UMahlangu uthe benze lokhu kulandela ukukhulumisana kwabo lohulumende ngokwethulwa nguNdanga.
UMahlangu uthi bekumele bakwenza kudala ukususa inkokheli yezokholo ezikhundleni nxa ithe yaphambuka kunjongo yokholo lwabo besebenzisa isisekelo sombuso senhlanganiso zabo.
Amanye amacala awetheswa uArchbishop Ndanga abalisa ukwephula isisekelo sombuso senhlanganiso yeACCZ, kakhulukazi isigaba sesibili. Bathi ubekhetha njalo inkokheli ayithandayo kungekho kuvumelana ledale laphezulu le Apostolic Bishops Conference.
Inhlanganiso le idinga ozayikhokhela kulandela ukuxotshwa kuka Ndanga. Kasenelisanga ukukhulumisana loNdanga ngodaba lolu.
