Iqembu leHighlanders liphakamise inkezo yeEasycall Cup ngemva kokunqoba eleChicken Inn ngeSonto enkundleni yeBarbourfields.
Abacubungula ezenguqu bathi sekuzakuba nzima ukuthi iqembu leli lingaqhatshi umqeqetshi obephethe intambo uAmini Soma Phiri.
IBosso inqobe iChicken Inn nge1-0, okubekauSoma Phiri kusimo esihle emehlweni abalandeli baleliqembu njengoba kumele iqhatshe umqeqetshi omutsha.
USoma Phiri ubephethe isikhundla esebenzisana loMelusi Sibanda kanye loCosmas Zulu njalo baphiwe lumlandu ngemva kokuxotshwa kukaBongani Mafu yena obesebenza loMandla Mpofu, uPeter Nkomo kanye loNetsai Moyo.
Ensukwini ezedluleyo iqembu leBosso likhuphe imbiko ethi kulabaqeqetshi abambalwa abadabuka phetsheya abalibhalele bedinga umsebenzi ikanti omunye walabo uErrol Akbay oyisizalwane selizwe leHolland uze wafika lase Zimbabwe.
Ekhuluma ngemva kokunqoba kweBosso uCosmas Zulu uthe yena bawufezile umlandu abawuphiwe yinkokheli yeqembu le Highlanders.
“Yikuthi abantu lapha elizweni bayeyisa abantu bakibo kodwa abantu abakwaziyo kudala lakudala ukuthi lapho okulo Cosmas Zulu kwenziwa njani, bayakwazi,” kutsho uZulu.
Ukaputeni weHighlanders uFelix Chindungwe uthi ngokunqoba kwabo baphindisele ukudliwa kwabo yiChicken Inn kumidlalo yeligi.
“Umdlalo kade utricky ngoba yi local derby njalo iChicken Inn ike yasidla home and away kuligi,” kutsho uChindungwe.
“I cup game its a different game altogether ngoba kumele lisebenze gadalala okwe 90 minutes lingaqeda sekuphelile, yikho esikwenzileyo.”
Iqembu leHighlanders lithole inkulungwane ezingamatshumi ayithobaminwembili ngokunqoba kwathi eleChicken Inn lathole inkulungwane ezingamatshumi amahlanu.
