amalinks wokungena

IBotswana Ihlolisisa Amaphepha Emisebenzi Ezizalwane zeZimbabwe

  • Martin Ngwenya

EleBotswana lithi lizimisele ukukhangelisisa udaba lokuncitsha kungelasizatho kanye lokuphuza ukunikeza amaphepha kwabokuza abadinga amathuba emisebenzi kwele Botswana.

Kulenani eliphezulu eleZimbabwe elikhala ngokuncitshwa amaphepha eBotswana, besithi abaphiwa izizatho ezizwakalayo.

Umphathintambo obona ngezemisebenzi eBotswana, uMnunzana Edwin Batshu uthi sesifikile isikhathi sokuthi kukhangelisiswe indlela ephuzayo yokunikeza abokuza amaphepha okuhlala kanye lokusebenza kulelo lizwe.

UBatshu ukhiphe umbiko othi ugatsha lwakhe seluqale ukuhluza masinya izicelo zencwadi zokusebenza lokuhlala eBotswana, esithi akazwisisi ukuthi kungani bekulokuphuza.

Inengi labeZimbabwe belikhala ngokuncitshwa kumbe ukwesulelwa incwadi lezi kungelasizatho.

Umnunzana Andreas Mpofu uthi linyathela abalamukelayo ukuthi uhulumende ahluze indlela aphatha ngayo indaba zencwadi zokusebenza eBotswana.

"Kuyabongeka lokhu, ngoba kudala bekuthatha noma inyanga eziyisithupha ukuthi baphendule. Nxa impendulo ibuya uthole ukuthi bakuncitshile amaphepha. Kugcono ukuthi bakutshele masinya ukuze wenze amanye amacebo."

Uthi ngitsho lamakampani abaqhatshayo acina edela inhliziyo uma kuthatha isikhathi ukulungisa lezincwadi, okungenza umuntu alahlekelwe ngumsebenzi.

“Amakampani awathandi ukuthi bekuqhatshe lamuhla behlale inyanga eziyisithupha ulokhe ulinde amaphepha. Lelinyathela liyatshengisa ukuthi bayalalela izikhalo zethu."

Umphathintambo uBatshu uthi uma kulezicelo ezinengi zencwadi lezi, iqula elakhwethwa nguhulumende ukuthi lihluze lezi zicelo kumele lihlale noma kabili ngeviki, ukuze konke kwenziwe ngokutshetsha.

Uhulumende weBotswana uchothozwe ngamandla aphikisayo esithi akulasizatho sokuthi kungani abokuza betshelwa ukuthi bazosebenza kumbe ukuvula amabhizimusi, kuthi lapho befika bencitshwe incwadi zokusebenza kumbe ukuhlala eBotswana.

AbeZimbabwe yibo abalenani eliphezulu balabo abadinga incwadi zokusebenza kumbe ukuhlala eBotswana bedlula inkulungwane eziyisikhombia, kwabokuza abafika inkulungwane ezilitshumi.

Facebook Forum

XS
SM
MD
LG