Omunye wabacebisi bakamongameli weZimbabwe, uMnu. Christopher Mutsvangwa, uthi abakubutho abalani lezokuqutshwa kokhetho elizweni. Uqhubeke ethi kabasoze baphazamise ukuqhutshwa kokhetho elizweni ngomnyaka ozayo.
Kodwa uthi kulilungelo labo njengaye wonke umuntu oyisizalwane seZimbabwe ukuphatheka kwezombusazwe. Ukhuthaze uzulu ukuba ehlukane lomkhuba wokubasola mahlayana.
UMutsvangwa wethule lokho eHarare ngoLwesibili esenzela ukuzigeza embikweni ophume kuphephandaba leNewsday, elilobe ukuthi ibutho, izinduna kanye labalwa impi yenkululeko bazabambisana ukukhankasela ibandla leZanu PF kukhetho oluzakwenziwa ngomnyaka ozayo.
Isakhamuzi seHarare, uMnu. Leopold Munhende, uthi kuvele kusobala ukuthi inkokheli yebutho ifuna kube lomongameli abamfunayo.
Esekhuluma phezu kokungeniswa kwabalembali yebutho kuhulumende, uMunhende uthe akalankinga lakho ngoba abantu laba sebetshiya ibutho.
UMutsvangwa uthe lubandlululo lolo olwenziwa yilabo abachothoza ukuphiwa izikhundla kwabanye akade bekubutho. Uqhubeke ethi lokho okwenziwe nguMongameli Emmerson Mnangagwa akuqali ngaye ngoba kwenziwa emazweni amanengi womhlaba. Banengi abantu emazweni atshiyeneyo abaphuma kubutho bengena kwezombusazwe.