Impumela yenhlolisiso yabenhlanganiso ecubungula ezombusazwe eye Zimbabwe Democracy Institute of (ZDI) iveza ukuba manengi amasotsha aphatheka kwezombusazwe lanxa abakubutho leZimbabwe Defence Forces belandula ukuthi kulamalunga abo aphatheka kwezombusazwe.
Abe ZDI baveze lokhu eHarare ngoLwesibili besethula ugwalo lwenhlolisiso le olulesihloko esithi ‘Zanu PF/Military Deterrence of the Village Vote:Perceptions on the 2018 Election Environment.
Omunye weziphathamandla ze ZDI, ophatheke kulol’uphenyo, uMnu. Bekezela Gumbo, uthi bakhulume labantu abatshiyeneyo kuphenyo lolu.
“Into esiyenzileyo njenge ZDI yikuthi sihambe sikhuluma labantu abahlala kuma communities ukuthi besitshele ukuthi bayake bawabone na kumbe hatshi amabutho phakathi kwabo njalo bazwa njani ma bewakhangele. Sibabuze njalo ukuthi kubenza bacabange kanjani njengoba sebezakuya vota. Esikutholileyo yikuthi amabutho akhona lobanje uhulumende esithi balandelela uhlelo lwabo lweCommand Agriculture.”
UGumbo uthi okwenze bakhetha ukuya ezigabeni abenzele khona linhlolisiso yikwanda kwabakubutho kulezo zigaba ezilamalunga ebandla leZanu PF axotshwa kubandla leli esetheswa umlandu wokuba yingxenye yababesekela owayengumongameli uMnu. Robert Mugabe lo,kakhe, uNkosikazi Grace Mugabe.
“Ukucabangela kwethu kwakungokokuthi sifuna ukuzwisisa ukuthi iZanu izokwenza kanjani ukuthi izame ukuthi ilungisise ama effects okuxotshwa kwalaba bantu ekhethweni. So, sakhetha izigaba zonalezo ezigoqela iTsholotsho North, Hurungwe, Zvimba North, Masvingo, sakhangela izindawo zonke ezilama MP axotshwayo awe Zanu PF.
“Yikho lapho esacina sesithola khona ukuthi hayi sekulamabutho amanengi kakhulu ukwedlula injwayelo. Abantu bona babona ingani amabutho lawa alapha ukwenzela ukuthi alapha ezobona ukuthi sivota njani njalo sivota kuhle.”
Omunye wabangene lumhlangano umqondisi womsakazo owe Voice Of the People, uMnu. John Masuku, uthe kuqakathekile ukuqhutshwa kwenhlelo zaloluhlobo.
“Kuhle ukuthi kugcizelelwe ukuthi kuliqiniso yini kumbe hatshi. Kodwa lapha siyabona ngokudingisisa lokucubungula okwenziwa ngabe ZDI ukuthi bathi ye yebo kulamabutho lanxa la mabutho engatshayi bantu engahlukuluzi bantu lokhuyana okokubahlukuluza emzimbeni yabo kodwa ukuba khona nje …”
Uthi endaweni enjenge Tsholotsho lokhu kukhumbuza uzulu umbhuqazwe weGukurahundi laph okwabulawa abantu abedlula inlulungwane ezingamatshumi amabili libutho leFifth Brigade elalolongwa lilizwe leNorth Korea.
