amalinks wokungena

Breaking News

ICabinet Ihluza Udaba LweVoters' Roll

  • Ntungamili Nkomo

Idale labaphathintambo bakahulumende ele Cabinet, ngoLwesibili liqhubeke lihluza udaba lwengxaki ezihlangana labantu abafuna ukubhalisela ukuvota kukhetho oluzayo.

Lelidale lixoxe kabanzi ngaloludaba ngeviki edluleyo njalo liqhubeke ngalo ngoLwesibili abaphathintambo bamabandla bamacele womabili eMDC labeZanu PF bevumelana ukuthi ukubhaliswa kwabantu akuphathwa ngemfanelo.

Umsekeli kaMongameli welizwe uNkosikazi Joyce Mujuru uveze ukuthi wakhangela amabizo ezihlobo zakhe esezike zavota kukhetho olwedlulayo kodwa kawatholanga kuluhlu lwe-Voters' Roll.

Abanye abakhulume ngaloludaba beveza insolo efanayo bagoqela uMnu Welshman Ncube, uMnu Morgan Tsvangirai, uMnu Tendai Biti, uNkosikazi Theresa Makone labanye.

Ngaphandle kokuswelakala kwamabizo abantu asebeke bavota ngaphambilini, inengi libikwa lisehluleka ukubhalisa kuhlelo lwe-mobile voter registration ngoba beyabe bengelazo zonke indingeko.

Ingcwethi kwezombusazwe njalo engumgcinisihlalo weNANGO uMnu Effie Dlela Ncube utshele iStudio 7 ukuthi kuyajabulisa ukuthi iMDC leZanu PF ziyavumelana ukuthi ukubhaliswa kwabantu akuqhutshwa ngemfanelo.

Ngalokho, uNcube uthi uhulumende kumele athathe amanyathelo kulungisiswe loludaba.

"Ngiyabonga ukuthi bavumelana labantu beZimbabwe ukuthi uhlelo lwe-voter registration aluhambi ngendlela efaneleyo. Kudala inhlanganiso ezizimeleyo zikukhuluma khonokho," kutsho uNcube.
XS
SM
MD
LG