Iqembu lomdlalo kakhilikithi elimela ilizwe leAfghanistan libikwa selingasabuyi ukuzodlala kwele Zimbabwe njengalokho obe kuhleliwe kungenxa yokuqansa kwenani lababanjwa belegcikwane leCovid 19 elizweni.
Isikhulumeli senhlanganiso ye Zimbabwe Cricket, uDarlington Majonga uthi uhulumende walile ukubapha imvumo eyokuba badlale leqembu le Afghanistan ngoba inani labantu asebetholakale belomkhuhlane we Covid – 19 liqhubekela phambili lilokhu liqansa mihla ngemihla.
“Besilesifiso esokuthi sidlale njalo umdlalo kakhilikithi elizweni kodwa ngikhuluma kanje amalungiselelo awokuba sidlale leqembu le Afghanistan sesiwamisile. Lokhu kungenxa yokumemetheka komkhuhlane we Covid 19 elizweni okwenze uhulumende angezelele indlela ezokuvikela abantu,” kutsho uMajonga.
Iqembu le Zimbabwe bekumele lingqikilane lele Afghanistan kumidlalo emihlanu eyohlobo lwe T20 kusukela mhla zingamatshumi amabili lambili kunyanga kaNcwabakazi.
UMajonga uthi ukungabi khona kwalimidlalo kutsho ukuba umkhuhlane we Covid 19 usukhuthise iqembu le Zimbabwe ukudlala lamaqembu abalisa ele Ireland, Australia, India kanye lalo ele Afghanistan.
“Sasicele ku hulumende ukuba asivumele ukuba siyidlale limidlalo njalo sithembisile ukwenza konke okukhuthazwayo ukuba kwenziwe ukuze umkhuhlane ungamemetheki.
Uhulumende wathi lokhu kakweneliseki ngoba amaqembu amanye amazwe engavunyelwa ukungena elizweni njengendlela eyokuvikela ukumemetheka komkhuhlane,” kutsho uMajonga.
UMajonga uqhubekele phambili wathi abadlali bazaqhubekela phambili bezilolonga bengakibo njalo kungenzeka iqembu le Zimbabwe liyedlala elizweni le Pakistan ngenyanga ka Mfumfu nxa isimo singabangcono.
Umkhuhlane we Covid – 19 usuhlasele abantu abedlula izigidi ezingamatshumi amabili selokhu uqhamuke ekupheleni kwanyakenye elizweni lase China njalo usubulele abantu abedlula inkulungwane ezingamakhulu ayisikhombisa emhlabeni jikelele.
Kwele Zimbabwe kulabantu abedlula inkulungwane ezine abatholakale belomkhuhlane we Covid – 19 njalo sekufe abantu abedlula ikhulu.