amalinks wokungena

Breaking News

Idale leBotswana Lithi Kaliseyilo Cala Ukuthandana Kwabobulili Obufanayo


Umthethwandaba waphezulu kweleBotswana usunqume ukuba akuseyilo cala njengakuqala ukuthi abantu bathandane ngobulili obufanayo kulelo lizwe.

EleBotswana lilizwe lesithathu ezwekazi leAfrica eselikubeke sobala emthethweni ukuthi lihlonipha ilungelo labakhetha ukuthandana ngobulili obufanayo, owesilisa ethandana lowesilisa lowesifazana ethandana lowesifazana.

Abathandana ngobulili obufanayo kweleBotswana babuye ngobunengi emthethwandaba waphezulu oweHigh Court eGaborone, ukuzokuzwa uMahluli Michael Leburu esethula isinqumo sokuthi akuseyilo cala ukuthi abantu bakhethe ukuthandana ngobulili obufanayo, owesilisa ethandana lowesilisa loweifazana ekhetha ukuthandana lowesifazana.

Kuqala bekulicala kweleBotswana ukuthi abantu bakhethe ukuthandana ngobulili obufanayo, loba ukungena emacansini, belakho ukubotshwa bevalelwe ejele okweminyaka efika eyisikhombisa.

UMahluli Leburu esethula isinqumo sakhe, uthe isikhathi sesifikile ukuthi kunanzwe amalungelo abantu bonke, kungakhathalekile ukuthi balihlekana. Uthi uhulumende angeke aqhubeke esiba lipholisa emakamelweni abantu abadala.

Udaba lolu, lwaphanyekwa yisifundi sekolitshini leUniversity of Botswana, umnunzana Letsweletse Motshidiemang, owathi abathandana ngobulili obufanayo, kumele bavunyelwe kungela mithetho ebanqabelayo.

Igqwetha elimela uMotshidiemang kanye labanye bakhe, umnunzana Tshiamo Rantao, wamukele ngenjabulo isinqumo somthethwandaba…

"Akusoke kube lobandlululo phezu kodaba lokuthi umuntu ulala lobani, kusukela lamuhla kusiya phambili. Yisinqumo esilenqubela phambili, engithemba ukuthi sizajatshulelwa umhlaba wonke jikelele."

Kukanti isikhulumi sabathandana ngobulili obufanayo, umnunzana Cain Youngman, uthi bona kade bengaceli okunengi kumthethwandaba, kodwa ukuthi labo baphathwe njengabo bonke abantu…

"Lokhu kusibeka endaweni efanayo labo bonke abanye abantu. Besingaceli okunengi okumangalisayo, besicela nje ukuthi lathi siphathwe ngokulinganayo njengabanye aBatswana, kuphela."

OweZimbabwe okade esemthethwandaba ukuzalalela loludaba, umnunzana Vumani Madlela, uthi loludaba olusegudwini, luthinta abeZimbabwe abaseBotswana, abathandana ngobulili obufanayo...

"Bakhona abakithi othula ukuthi ngama homosexuals. Kade besesaba ukuthi babonakale mgceke, ngenxa yokuthi bangabotshwa. Kodwa khathesi balakho ukukhululeka, noma nje besazi ukuthi ekhaya, eZimbabwe, kakuvunyelwa.

EleBotswana, ngokunanza amalungelo alabo abathandana ngobulili obufanayo, lilandela kunyathela elathathwa ngamazwe abalisa eleAngola kanye leSeychelles. EleSouth Africa kade lananza amalungelo abo, kukanti eleZimbabwe alifuni kuzwa phezu kwaloludaba, kulandela ukuthi owayengomongameli welizwe, umnunzana Robert Mugabe abathuke esithi bayedlulwa layizinja kanye lengulube.

please wait

No media source currently available

0:00 0:02:38 0:00
XS
SM
MD
LG