amalinks wokungena

Breaking News

Idale LeCabinet Lihluza Udaba Lodlakela

  • Ntungamili Nkomo

Idale labaphathintambo bakahulumende eleCabinet lihluze kabanzi ngoLwesibili udaba lokutshiselwa endlini kwendondana yesiphathamandla seMDC-T eHeadlands ngempelaviki, amalunga eZanu PF leMDC esola kakhulu lesisiga.

Umphathintambo obona ngokwenzakala ewofisini kaMnu Morgan Tsvangirai uMnu Jameson Timba nguye oqale loludaba watshengisa amalunga edale imifanekiso yesidumbu sikaChristopower Simbarashe Maisiri sitshile kanye lendlu atshiselwe kuyo ngabantu abanakanelwa ukuthi ngabasekeli beZanu PF.

Abaphathintambo bamabandla wonke akuhulumende basole kakhulu isehlakalo lesi bavumelana ukuthi amapholisa kumele asebenze gadalala abophe abaphatheka kuloludaba.

Bathe njalo iJomic kumele icwayisise loludaba. Idale lilaye njalo isikhulumeli sikahulumende uMnu Webster Shamu ukuthi ethule umbiko wenduduzo ovela kuhulumende usiya kumuli yakoMaisiri.

Abatshisele lumntwana endlini laba babikwa babedinga uyise, uMnu Shephered Maisiri oyisiphathamandla seMDC ekhokhelwa nguMnumzana Morgan Tsvangirai eManicaland.

Olunye udaba olumqoka oluhluzwe yiCabinet ngolokuthathelwa kwabantu amaRadio abo asebenzisa amandla elanga aweSolar amagagase aweShortwave, ngamapholisa. UNkosikazi Priscillar Misihairambwi Mushonga ubikwa enikeze uMuongameli Robert Mugabe i-radio efana lalawo athathelwa uzulu, esithi kumele azibonele laye ukuthi kukhona yini okubi ngayo okubangela ukuthi amapholisa ahlukuluze uzulu.

UMugabe ubikwa ephe impendulo yokuzidlalela esithi manje njengoba laye selayo li-Radio kasoze abotshwe yini.

Ingcwethi kwezombusazwe uDr. Nkululeko Sibanda utshele lumsakazo ukuthi lanxa udaba lodlakela lusolwe kakhulu yiCabinet, kaboni luphela loludlakela.
XS
SM
MD
LG