Umthethwandaba weSupreme Court ukhangelelwe ukuhluza isicelo sikaMnu Paul Siwela okwesibili ngoLwesine sokuthi avunyezwe ukuhlawula imali yesibambiso ukuze akhululwe kumbe aqhubeke evalelwe.
USiwela yisiphathamandla senhlanganiso yeMthwakazi Liberation Front, njalo ubotshwe ngoMbimbitho lamalunga alinhlanganiso amabili athi uMnu John Gazi loMnu Charles Thomas besetheswa umlandu wokuzama ukugenqula uhulumende.
UThomas loGazi sebakhululwa kodwa uSiwela ulokhu evalelwe eKhami njalo amagqwetha akhe athi akasaphilanga.
Kudaba olufanayo, uhulumende selahle icala lokuqoqa umvukela ekade elethesa uMnu Munyaradzi Gwisayi lamamalunga amahlanu enhlanganiso yakhe yeInternational Socialist Organisation.
UGwisayi labanye bakhe sebesetheswa icala lokweyisa uhulumende. Ukuhlaziya loludaba uNtungamili Nkomo weStudio 7 uxhume ingcwethi ecubungula ezombusazwe uMnu Nkululeko Sibanda.
Kunjalo nje, amalunga eZimbabwe Human Rights Association amabili abotshwe ngeviki edluleyo eNyamendlovu akhululwe ngoLwesihlanu.
UMnu Walter Dube ukhululwe kungela cala alethesiweyo kwathi uNkosazana Florence Ndlovu wetheswa icala lokudinda imbiko yamanga ehlambaza uhulumende.
UNdlovu umiswe emthethwandaba ngoLwesihlanu. Icala lakhe lizathoniswa kumaviki ambalwa alandelayo.
