Idale leZanu PF Politburo lithi aliwamukeli umhlahlandlela oqoqwe ngabamela amabandla akuhulumende womanyano, wona ohlela izikhathi okumele zilandelwe kulungisiswe konke okuhluphayo kuhulumende andubana kuyiwe kukhetho.
Amalunga alelidale athethe isinqumo lesi emhlanganweni awuqhubele eHarare ngoLwesithathu lapho agcizelele njalo ukuthi ukhetho kumele lwenziwe lonyaka.
Phansi komhlahlandlela wokhetho, abamela iZanu PF leMDC kunkulumo bavumelana ukuthi inguquko abayenzayo kuElectoral Ammendment Bill kumele ifakwe ibe ngumthetho kungakedluli amalanga angamatshumi amane lanhlanu kuqala ngenyanga ezayo.
Bavumelana njalo ukuthi imfundiso kazulu mayelana lokuvota kumele iqale kungakedluli inyanga, kanti loluhlu lwabalelungelo lokuvotha olwevoters roll lalo kumele luhlelwe kakutsha kungakedluli amalanga angamatshumi amane lanhlanu kuqala ngenyanga ezayo.
Abamela iZanu PF kunkulumo nguMnu Patrick Chinamasa loMnu Nicholas Goche, njalo labo bavumelana labamela amacele womabili eMDC ukuba yonke linguquko abayenzayo kumele ilandelwe.
Kodwa iPolitburo yebandla labo ithe ayikungeni lokhu, yathi izikhathi ezafakwayo lezi kumele ziphikise ukwenzela ukuthi ukhetho lwenziwe lonyaka, lungaze lwadluliselwa phambili njengokufuna kwabeMDC.
Omela iMDC ekhokhelwa nguMnu Welshman Ncube kunkulumo, uMnu Moses Mzila Ndlovu uthe idale leZanu PF liyaphambanisa ngokudinga ukuguqula lokho okuvunyelenwe ngabamela amabandla kunkulumo.
Amazwi kaMzila agcizelelwe ngumsekeli wesikhulumeli seMDC kaMnu Morgan Tsvangirai, uNkosazana Thabitha Khumalo.
Kunjalo nje kulamalunga eMDC kaTsvangirai amabili athi uMnu Abel Samakande loMnu Steven Zenda abathunjwe ngabasekeli beZanu PF ngoLwesine eMbare bababhaxabula kakubi. Ababili laba balaliswe kwesinye isibhedlela eHarare.
