amalinks wokungena

Breaking News

Labor Court: Izisebenzi Ezikhalala Umsebenzi Kazisoze Zihole


Hwange Colliery
Umongameli womthethwandaba wendaba zezisebenzi owe Labour Court koBulawayo uJustice Mercy Moya-Matshanga unqume ukuba ukukhalala umsebenzi osekudonse amaviki okwenziwa yizisebenzi zenkampani yeHwange Colliery Company akukho emthethweni waphinda waqondisa ukuthi ngaleso sizatho, linkampani akumelanga ibhadale iholo lamaviki omabili ezingasebenzanga.

Text: UJustice Moya-Matshanga wethule lesi sinqumo edabeni olulethwe edale yinkampani ye Hwange Colliery ebimangalele izisebenzi isithi azilandelanga umthetho we Labour Act ngesikhathi zithatha inyathelo lokukhalala umsebenzi, ngakho kumele zibuyele emsebenzini ngokuphangisa.

UJustice Moya-Matshanga uthe uthola ukukhalala umsebenzi lokhu kungekho emthethweni ngoba kuphambene lo Section 104 (2) we Labour Act wona othi izisebenzi kumele zazise abaqhatshi kusasele amaviki amabili ukuthi zifuna ukukhalala umsebenzi.

Ngenxa yalokhu, ukukhalala umsebenzi okuse Colliery kutholakale kungekho emthethweni njalo idale liqondise ukuthi kumiswe kusukela labo abamele izisebenzi besemukela isinqumo sedale.

Liqondise njalo ukuthi linkampani ingabhadali iholo lezisebenzi kusukela mhlaka 14 Mfumfu ziqala ukukhalala umsebenzi kuze kuyefika mhlaka 29 Mfumfu.

Idale liphe njalo i Hwange Colliery imvumo yokuthi isebenzise imithetho yayo ukujezisa bonke abaphatheka ekukhalaleni umsebenzi lokhu.

Izisebenzi zikhalala umsebenzi nje zizama ukubamba ngamandla inkampani ukuthi ibabhadale njengoba sekulenyanga ezinhlanu zingaholi.

Zithi inkampani isiyenze izithembiso zamanga ezinengi okwenyanga ezintathu ezedluleyo isitho izaqala ukubhadala kodwa isehluleka.

Ngeviki ephelileyo, linkampani imise umsebenzi inkokheli ezintathu zenhlanganiso emele amalungelo ezisebenzi isithi yizo ezibangela ingxabangxoza ese Colliery ngokukhuthaza izisebenzi ukuthi zikhalale umsebenzi.
XS
SM
MD
LG