Inkampani yeEcoCash siyehlise imali umuntu oleDebit Card layo angayisebenzisa ephandle kwelizwe isuka kumakhulu amane amadola ($400) isiya kumakhulu amabili kuphela ($200) nxa uthenga ngenyanga.
Embikweni ewethule ngoLwesine iEcoCash ithe njalo isivumela umuntu ukukhipha amadola angamatshumi amahlanu ($50) kuphela emtshineni okhafula imali kumbe (ATM) ngenyanga.
Nxa ufuna ukuthenga kumbe ukubhadala ebulenjini (Online Payments) umuntu sevunyelwa amadola angamatshumi amahlanu njalo ($50).
Ingcwethi zithi lokhu kuveza sobala ukuthi umnotho welizwe uqhubeka usadalala njalo lamankampani esehluleka ukuqhuba kuhle amabhizimusi awo ngenxa yokusilela kwemali elizweni.
Usibalukhulu weReserve Bank of Zimbabwe wazise ngoLwesithathu ukuthi bazadinda imali engena kuzigidi ezingamakhulu amathathu zamadola ($300 million) yamabond notes emizameni yokuqeda ukusilela kwemali emabhanga.
Kodwa abanengi bathi lokhu akusoze kuqede udubo lokusilela kwemali.
“Okwenziwe yiEcoCash lokhu kutshengisa ukuthi amankampani aya elokhe ethola kusiba nzima ukuthi ethole imali yangaphandle kwelizwe, iforeign currency,” kutsho umhleli wephephandaba leThe Standard uMnu Kholwani Nyathi.
