amalinks wokungena

Breaking News

IHarare City Isikhokhela Engalaneni Yemiklomelo kuPSL


Highlanders
Imidlalo yenguqu esigabeni saphezulu eseCastle Premier Soccer League ebikhona ngempelaviki edluleyo itshiye sekulenguquko phezu kwengalane yemiklomelo lapho osekuhlezi iqembu le Harare City ngemva kokudla i-Highlanders 4 ka zero ngenSonto.

Iqembu le Harare City lithe ngokubhaxabula elikwenze ele Highlanders nge 4 ka nya emdlalweni obusenkundleni ye Rufaro ngenSonto lahle landiza layahlala emakhanda e Bosso le DeMbare.

IDynamos yona ibe ngutshiki lobhanqa 2 ka 2 leqembu le Chicken Inn emdlalweni obuseMagumeni njalo lumdlalo ubuyiqalele kubi ngoba ihlohlwe kabili kungakedluli imizuzu elitshumi lanhlanu kodwa yenelisa ukulinganisa umdlalo ungakapheli.

Ekhuluma ekupheleni komdlalo weqembu lakhe lele Chicken Inn umqeqetshi weqembu le Dynamos uKalisto Pasuwa utheusaselethemba lokuba iqembu lakhe lizenelisa ukuvikela isicoco seligi ngosuku lokucina lwemidlalo yalonyaka kusigaba sePSL.

Ngaphansi kwengalane amaqembu azabe edlala kusigaba sika Division One lonyaka ngathi iTripple B, iMotor Action, iMonomotapa ikanti iqembu lesine lingaphuma phakathi kwamaqembu athi iBlack Rhinos, iBlack Mambas, iBuffaloes, iHwange, iTriangle kanye le Shabanie Mine.

Kusenjaloukudliwa kweqembu le Highlanders sokudale impikiswano enkulu phakathi kwabalandeli baleliqembu kulabanye abasola ukungabi khona komqeqesthi waleliqembu uKelvin Kaindu yena oyekwenza izifundo zokungezelela ulwazi lwakhe lokuqeqetsha phetsheya kolwandle.

Abanye njalo ngabathi inkokheli ye Highlanders yiyo elenkinga ngoba ilokhu ingakakhulumisani loKaindu phezu kokuba uyaqhubeka yini esemsebenzini ngomnyaka ozayo njengoba isivumelwano somsebenzi alaso leqembu siphela ekupheleni kwalonyaka.

Kodwa olandela iBosso uBusani Ncube, uthi abantu abake bame
ukuxhophana ngoba kunengi okungenzakala ngosuku lokucina olwemidlalo.

Emidlalweni yosuku lokucina iDynamos izadlala le Black Mambas okungumdlalo ongasoze ubelula ngoba iqembu le Mambas lizama ukusinda engozini eyokugunyulwa kusigaba saphezulu, I Highlanders izadlala le Shabanie Mine kuthi iHarare City izadlala leqembu le Caps United.

Kolunye udaba olumayelana lomdlalo kanobhutshuzwayo, iqembu le Dynamos libhale incwadi likhononona ngokukhethwa kuka nompembe uHardly Ndazi ukuba aphathe umdlalo waleliqembu lele Chicken Inn ngensonto emagumeni.

IDeMbare iphe lincwadi obengusikomitshi kulumdlalo uNdumiso Gumede laye obebhaliwe kuleyoncwadi kuthiwa laye ukuphatha kwakhe lesosikhundla kuyasolisa ngoba engumsekeli kaMongameli wenhlanganiso yeZifa.

UGumede uthe ebuzwa zintatheli ukuba uthini ngaleyoncwadi njengoba laye esolwa phakathi kwayo wathi yena uzayidlulisela kwabe PSL abayibo abaqoqa imidlalo yesigaba saphezulu.

Incwadi le ibilotshwe ngunobhala jikelele weqembu le Dynamos uWebster Chikengezha njalo ibisithi unompembe uNdazi uhlala engabatshayeli kuhle yikho umdlalo wangensonto bawudlale belokukhonona.
XS
SM
MD
LG