amalinks wokungena

Breaking News

IHigh Court Ithi Kumele Amapholisa Enikwe Imbali Yencingo ZikaBiti


Idale leHigh Court eHarare ngoLwesihlanu lilahle isikhalazo somphathintambo wezemali uMnu Tendai Biti esokuthi amapholisa engavunyelwa ukufinyelela imbali eveza ukuba ukhuluma lobani kuncingo zakhe lokuthi kuyini ayabe ekuloba kuncwajana zeSMS.

Idale likamantshi livumele amapholisa kumaviki asanda kwedlula ukuthi abambe ngamandla inkampani yabomakhalekhukhwini, eyeEconet Wireless ukuthi iwanikeze ingwalo ezilembali yencingo zikaBiti, yena ongunobhala jikelele weMDC ekhokhelwa nguMnu Morgan Tsvangirai.

Lokhu kudale ukubana uMnu Biti aye emthethwandaba weHigh Court ephikisa lesisinqumo. Kodwa umahluli walelidale uJustice Chinembiri Bhunu unqume ngoLwesihlanu ukuthi isinqumo sikamantshi kumele silandelwe.

Amapholisa athi acabangela ukuthi uBiti engaba ephatheka kumisebenzi yokungethembeki, icorruption, ngakho, athi imbali yencingo zakhe ingawaphathisa kakhulu ekucwayisiseni loludaba.

Igqwetha likaBiti uMnu Innocent Chagonda utshele iStudio 7 ukuthi bahle bakhweza isicelo eSupreme Court bedinga ukulahlwa kwesinqumo sikamahluli Bhunu.

Lokhu kutsho ukubana inkampani yeEconet ayenelisi ukuvumela amapholisa ukuba efinyelele incingo zikaBiti okwamanje. Kodwa idale leSupreme Court lingavumelana lesinqumo sikaBhunu, lokhu kuzamele kwenziwe.

Umsekeli wesikhulumeli seMDC ekhokhelwa nguMnu Morgan Tsvangirai, uNkosazana Thabitha Khumalo utshele uNtungamili Nkomo ukuthi uBiti sethembele kuSupreme Court lanxa nje efiphele amathuba okuthola isinqumo esehlukeneyo.

XS
SM
MD
LG