amalinks wokungena

Breaking News

IJomic Iveza Ukuthukuthela Okukhulu NgeSadc


Ugatsha olubona ngokufezwa kwesivumelwano seGlobal Political Agreement, olweJomic luthi lukhathazeke kakhulu ngokuphuza kweSadc ukuthumela iqula elizancedisana lalolugatsha ukulungisisa okuhluphayo kuhulumende womanyano.

Emhlanganweni wayo oqhutshelwe kweleSouth Africa ekuqaleni kwenyanga edluleyo, iSadc yavumelana ukuthi izakhetha ngokuphangisa iqula elilabantu abathathu abazakuyasebenza leJomic kulungiswe okuhluphayo kusivumelwano seGPA.

Kodwa iJomic ithi lalamhla lokhu, ayikezwa lutho ngequla leli. Ithi njalo ibandla leZanu PF seliqalise uhlelo lokuvula inkamba elizweni lonke jikelele lapho elilolonga khona abasakhulayo libafundisa ngokuhlukuluza uzulu.

Ngalokhu, iJomic ithi iqula leSadc leli liyadingeka ukuthi lalo lizibonele okwenzakalayo lithathe amanyathelo.

Umabhalene weSadc uMnu Tomaz Salomao utshele lumsakazo ukuthi iqula leli lizasebenza lequla likaMongameli Jacob Zuma njalo eZimbabwe lizahamba kuphela nxa iqula likaZuma lisiya khona.

Kodwa lokhu ayisikho okwavunyelwana yiSadc ngoba ugwalo olwakhitshwa yilinhlanganiso ngemva komhlangano weSouth Africa lo lukubeka sobala ukuthi iqula leli kumele lisebenzelane leJomic hatshi iqula likaZuma.

Esinye seziphathamandla zeJomic uNkosazana Thabitha Khumalo uthe iyabadanisa imbiko kaMnu Salomao.

XS
SM
MD
LG