amalinks wokungena

Breaking News

Inhlanganiso YamaDayimana eyeKPCS Isungula Umhlangano eSouth Africa


Ambassador Phelekezela Mphoko loMnu. Walter Chidhakwa emhlanganweni we KPCS(Photo by Benedict Nhlapho)
Inhlanganiso ekhangela ukusetshenziswa kwamadayimana ekubangeleni udlakela lezimpi, eye Kimberly Process Certification Scheme iqale umhlangano wamalanga amane eJohannesburg ngoLwesibili, ilola indlela ezibukhali okufanele izisebenzise ekulwisaneni lokusetshanziswa kwamadayimana ekudaleni ingxabangxoza lempi. Umphathintambo wezemigodi osanda kukhethwa eZimbabwe umnumnzana Walter Chidhakwa, uthi uyathokoza ngokuzongena lumhlangano ngesikhathi inhlelo zokwenjiwa lokuthengiswa kwedayimana eZimbabwe sezemukelwe yinhlanganiso ye KPCS. Kodwake kukhanya abenhlanganiso zikazulu kabavumelani laye.

Amanxusa aphuma enhlanganisweni zikazulu, ohulumende kanye lamankampani ezamadayimana emhlabeni jikelele, athe gwaqa eJohannesburg emhlanganweni wokulola amaqhinga azakwenza inhlanganiso ye Kimberly Process Certification Scheme (KPCS), yenqabele ngokupheleleyo ukusetshenziswa kwamadayimana ekubangeleni udlakela lezimpi.

Lobanje kungelampi eZimbabwe, ukwenjiwa kwedayimana endaweni yeMarange okuqale eminyakeni embalwa edlulayo, kuvuse omkhulu umsindo sekusetheswa inkokheli zezombusazwe lenkokheli zebutho umlandu wokuhlukuluza izakhamizi lokuhuquluza idayimana ngendlela ezingacaciyo.

Ekhuluma ekuvulweni komhlangano lo wamalanga amabili, uAmbassador Welile Nhlapho wakwele South Africa, uthe ulethemba lokuthi amanxusa akulo umhlangano azabona lapho iKPCS esilela khona bethule izinqumo ezizakwenza kube lula ukulwisana lomkhuba wokusetshenziswa kwamadayimana ezimpini.

Umphathintambo wezemigodi osanda kukhethwa eZimbabwe umnumnzana Walter Chidhakwa uthi uthatshiswe yikuthi iZimbabwe ingena lo umhlangano ngesikhathi indlela egebha lokuthengisa ngayo idayimana isiyemukelwe yinhlanganiso ye KPCS. Uthi njengomphathintambo omutsha kulolugatsha, ulethemba lokuthi uzafunda okunengi kulo umhlangano.

Ngakolunye uhlangothi, okhokhela abehlanganiso zikazulu kulo umhlangano umnumnzana Shamiso Mtisi, uthi lobanje inhlanganiso ye KPCS isiyemukele indlela ezamadayimana eziqhutshwa ngayo eZimbabwe, yavumela leZimbabwe ukuthi iqale ukuthengisa idayimana layo, kusasekunengi okusafanele iZimbabwe ikwenze.

Kodwa umphathintambo wogatsha lwamatshe aligugu kwele South Africa unkosikazi Suzan Shabangu uthi akavumelani lalokho.

Inhlanganiso ye KPCS ibunjwe kwele South Africa ngo 2003 ngenjongo yokwenqabela umkhubalo wokutshaphazwa kwamadayimana. Loba kunjalo ukusetshenziswa kwamadayimana ekukhwezeleni izimpi emazweni afana le Democratic Republic of Congo, Central African Republic, i-Sierra Leone lamanye kukhanya kuqhubekela phambili.

IChina yiyo ekhangelelwe ukuthatha isihlalo sale inhlanganiso ekupheleni kwalo umhlangano ngolweSihlanu.
XS
SM
MD
LG