amalinks wokungena

Breaking News

Ilanga Thutshu! Izizalwane zeZimbabwe eBhilitane Ziyatshakala, Zisosa


Ezinathwayo

Izizalwane zeZimbabwe ezihlala kweleBhilithane seziqalile ukutshakala ngoba umumo womkhathi usuguqukile sokulesikhudumezo ngoba umqando sowavalelisa, usuzwakalela ngale phetsheya kolwandle ngase Africa.

Ukutshisa kwelanga kulelozwe sokusitsho ukuba sesifikile isikhathi senjabulo esamawoso.

Baphuma njengobunyonyo buphuma emlindini abeZimbabwe njengabo bonke emhlubulweni waseEurope abantu bkulapho abathola ithuba lokwethekelela indawo ezitshiyeneyo benyakazela bejabulela isikhathi sokutshisa, abadala, abatsha labantwana behlangana maviki wonke emadolobheni atshiyeneyo eNgilandi, kuwoswa inyama kudliwa, abantu bezijabulisa ngemiculo ehlukeneyo yeZimbabwe lezwekazi leAfrica.

ULeo Litshe yisizalwanze seZimbabwe esesihlala edolobheni leLeicester.

Kutsho uLitshe: “Ilanga liyatshisa manje lana eUK, sesihlangene kucommunity sidlala ibhola, sitshisa inyama kumnandi siphuza amatshwala, sizibambile lapha eLeicester thina bonke labo John Terry labobhudi uRichard bakhona you know, ma ilanga litshisa kanje siyawosa, baphumile ezindlini, good work, kumnandi lana, siyakholisa lebhora liyadlalwa esayidini.”

Imicimbi le akutshiswa nyama lokudliwa kuphela, unkosazana Nobuhle Nkomo uchaza okunye okwenziwa ngamakhosikazi kulezindawo zamawoso.

“Mina ngihlala lapha eSlough sesiqalisile ukuwosa njengabantu abanengi, ilanga seliphumile lapha eSlough kuyatshisa. Siyahlangana singabomama labantu abatshiyeneyo nje labobaba, But mainly thina nxa singomama sihlangana siyabe sizixoxela nje ngento zokwakhana, ukuncedisana nje lokuthi sithumela njani izimali ekhaya sikhuluma ngento zepolitics, yikho esihlangana khona eSlough Cricket Club siwosa siphatha nje indaba ezitshiyeney,” kutsho uNkomo.

Amawoso la avulwe ezindaweni lasemadolobheni atshiyeneyo kweleBhilithane njalo aqale ngempela viki esiphuma kuyo.

UMnu. Thamsanqa Ncube ungutshisanyama laye.

Kutsho uNcube: “NgiseBradford lapha eButchery siyawosa kumnandi senza iBBQ, kugcwele wonke umuntu wasekhaya, sihlangene ngobunengi esibuya endaweni ezitshiyetshiyeneyo. Yiso isikhathi sethu manje thina ngapha eUK ukuthi sikholise lathi kesizwe ilanga lakithi esilijayeleyo ngoba liyazi ngapha kuhlala kuqanda kukekune izulu.”

Ilanga litshisa bhe eNgilandi kulezinsuku, likhipha inhlanzi emanzini, yiso isikhathi izizalwane zeZimbabwe eziphuma ngobunengi zisiyahlanganela ndawonye zichitha isizungu, ziqolotsha, zijabula, kuxoxwa, kuxokozelwa, kudliwa njalo kugidwa, yiso isikhathi esibakhumbuza ekhaya abadabuka khona eZimbabwe.

please wait

No media source currently available

0:00 0:04:37 0:00

Facebook Forum

XS
SM
MD
LG