amalinks wokungena

Breaking News

IZimbabwe Inanza Uzibuse Ngesikhathi Ilizwe Libhekane Lokusilela Kwemali


Bekungabizwa ozwayo ngoLwesine koBulawayo lapho inkulungwane lenkulungwane zabantu bezithe gwaqa enkundleni yeWhite City Stadium bethakazelela ilanga lokuthola uzibuse weZimbabwe.

Amapholisa lebutho leZimbabwe babukise imidlalo yabo eyehlukeneyo bejabulisa umbuthano lo.

Kunanza uzibuse koBulawayo.
Kunanza uzibuse koBulawayo.

Engakabali umbiko oqakathekileyo wokunanza leli langa okaMongameli Robert Mugabe, umphathintambo obona ngedolobho leli emele uhulumende, uNkosikazi Sandi Nomthandazo Moyo labakhokheli bamapholisa lebutho, bahlole ivuyo lebutho, amapholisa, labagcina izibotshwa akade befolile.

UNkosikazi Moyo uthe uyajabula ukuba ilizwe selifikise iminyaka engamatshumi amathathu lasikhombisa lathola uzibuse esithi amhlophe akubelentuthuko elizweni umuntu wonke azizwe ekhululekile.

UMeya wedolobho lakoBulawayo, uMnu. Martin Moyo, laye uthe kuhle ukuthakazelela ilanga likazibuse.

Okwenzakale ngoLwesibili eZimbabwe.
Okwenzakale ngoLwesibili eZimbabwe.

Usomabhizimisi weZimbabwe oseSouth Africa, uMnu. Justice Maphosa, uthe kuhle ukuqakathekisa ilanga nomanje abasakhulayo abaliqakathekisi kodwa bekhona abalifelayo leli langa.

UMnu. Absalom Sikhosana, olilunga ledale lePolitburo kubandla leZanu PF, uthe uMthwakazi ajabulele ilanga likazibuse kodwa kumele akhumbule intengo yegazi eyahlawulwa yilabo abalikhululayo.

Umkamuyi uLookout Masuku, uNkosikazi Gift Masuku, uthe kuhle kulozibuse ngoba sebehamba lapho abamhlophe ababengabavumeli khona abantu abansundu.

UNkosikazi Letitia Malunga, ikhosikazi likamuyi uSydney Malunga, laye uthe uyajabula ukubona abantu beze ngobunengi bezothakazelela ilanga likazibuse.

Zimbabwe Independence Anniversary
Zimbabwe Independence Anniversary

Abasakhulayo labo baze ngobunengi bezonanza ilanga likazibuse.

Ilanga belitshisa okwamagama okubangele ukuwa kwelinye ipholisa ebelimi mpo lilinde abahlonitshwa.

Uzulu ubejabuliswa ngemcimbicimbi eyehlukeneyo yemiculo yendulo, eyeqembu labezomvikela kanye lomdlalo wenguqu eMagumeni lapho bekungqikilana iqembu leCAPS United leleFC Platinum.

XS
SM
MD
LG