amalinks wokungena

Breaking News

IMDC Isola uChombo Ngokuxotsha uMayor weGwanda


Icele leMDC elikhokhelwa nguMnu Welshman Ncube selisole ukuxotshwa umsebenzi kukameya weGwanda ngumphathintambo obona ngentuthuko yezabelo uMnu Ignatios Chombo.

UChombo uxotshe uMnu Lionel De Necker ngoLwesine emethesa icala lokwala ukulandela umlayo wakhe wokuthi aqatshe uNkosikazi Priscillar Nkala ukuba ngumabhalane wekhansili.

Ikhansili yeGwanda yale ukwamukela umlayo kaChombo ngoba uMaNkala engenzanga kuhle ngesikhathi likhansili ilinga abafuna lumsebenzi.

UMaNkala ubikwa edlulwe ngabantu abane, kodwa uChombo uthi kumele umsebenzi unikwe yena lanxa kunjalo.

UChombo ngumuntu owaziwa ngokuphazamisa ukusebenza kwamakhansili emadolobheni aphansi kweMDC, agoqela eyeHarare leyeChitungwiza lapho axotshe khona amakhansila amanengi eminyakeni edluleyo.

Umqoqi obona ngenhlelo zeMDC kaNcube uMnu Qhubani Moyo uthi okwenziwe nguChombo kuveza sobala ukuthi imizamo yakhe yokudiliza amakhansili eMDC iyaqhubeka.

Isakhamizi seGwanda, uMnu Jaston Mazhale, yena ongumbalisi, uthi uDe Necker ubesebenza gadalala njalo eletha intuthuko kulelidolobho.

XS
SM
MD
LG