Owake waba ngumphathintambo wezempilakahle ngesikhathi sikahulumende womanyano u Dr Henry Madzorera onguye njalo unobhala wohlangothi lwezempilakahle ku MDC ekhokhelwa ngumnumzana Nelson Chamisa ukhuthaza uhulumende ukuba ahloniphe isivumelwano se Abuja Declaration asisayinayo esiphathelane lomsebenzi wogatsha lwezempilakahle.
Lesi sivumelwano sikhuthaza ohulumende bamazwe awezwekazi le Africa ukuba atholise isilinganiso esedlula esilitshumi lanhlanu ekhulwini-15%, semali eyabelwa ingatsha zikahulumende ukuba iye kugatsha lwezempilakahle emazweni lawo.
Emhlanganweni lentathezindaba owenzelwe esigodlweni se MDC – e Harvest House, u Dr Madzorera uthi asikho isizatho sokutholisa abezomvikela lezinye ingatsha zikahulumende imali enengi kulephiwa abezempilakahle.
"Uhlangothi lwezempilakahle kakusi hlangothi olungenisa imali. Lufana lolwezemfundo kanye lolokulondoloza uzulu kalungenisi mali. Zonke lezi nhlangothi zithembele kuhulumende ukuba azitholise imali ngoba ziqakathekile. Kuyini uhulumende okumele akwenze?. Kumele alutholise imali loluhlangothi. Sasilobudlelwano obuhle kakhulu labenhlanganiso ezitholisa usizo umhlaba wonke. Kodwa akusenjalo kubangelwa zindaba zokungemukelwa kwenkokheli esike sakhuluma ngakho. Uhulumende kumele atshengise ukuzinikela kwakhe ekukulungisiseni lokho ukuze buvuselelwe lobo budlelwano lenhlanganiso zakwamanye amazwe."
Inkuthazo kaMadzorera iza ngesikhathi izisebenzi zikahulumende ezibhedlela okugoqela odokotela beqhubeka bekhalala umsebenzi sikhathi sonke bekhala ngokusilela kwe mithi ezibhedlela, impahla yokusebenzisa kanye leholo abathi liqhubeka lincipha ngenxa yesimo somnotho esiqhubeka sisiba sibi.
Esinye seziphathamandla kuhlangothi lwabasakhulayo kuMDC, u Ostallos Gift Siziba uthi ukungalandelwa kweAbuja Declaration ngokunye osekubangele indubo uhlangothi lwezempilakahle olubhekane lazo manje.
"Okusafayo ngama ordinary citizens and uhulumende kalandaba lozulu. Kodwa kimi kungivezele ukuba uhulumende lo akakwanisi ukuthi anakekele abantu ngenxa yokuthi akazalwanga ngabantu. Yikho lapho esilohlupho khona."
Kodwa uthi akaboni uhulumende kaMongameli Emmerson Mnangagwa ekwanelisa lokho.
"Inkinga yikuthi uhulumende kazalwanaga ngabantu njalo akasoze anelise ukunakekela abantu ngoba wazalwa ngamasotsha. Manye amasotsha ajwayele ukuthi nxa kungaba lenkinga siyatshaya abantu, kungaba lenkinga,okuthiwa yikufaka abantu emfolweni. Manje into ze civilian leadership azisebenzi njalo. Abantu bayakhulunywa labo kuvunyelwanwe."
Ingcwethi kwezombusazwe zithi isimo kuhlangothi lwezempilakahle sesibangele ukuba izisebenzi zalo zihlale zingezikhala kokuphela ngesimo ezibhedlela.
Engazigcwalisi uhulumende izithembiso ahlezi ezenza lapho izisebenzi zithe zakhala ngokuhluphayo okubalisa ukusilela kwemithi ezibhedlela, impahla yokusebenzisa efana lama gloves lokunye kanye leholo lazo eliqhubeka lincipha.
Imizamo yokukhulumisana lomphathintambo wezempilakahle u Dr Obediah Moyo yehlule ucingo lwakhe luqhubeka lungasatshelwa.
