amalinks wokungena

Breaking News

MDC-T: UMnu. Nelson Chamisa Nguye Osaphethe Isikhundla Sokukhokhela Ibandla


Umnumzana Nelson Chamisa

Inkokheli yebandla le MDC – T ihlangene eHarare ngoLwesihlanu yavumelana ukuthi uMnu. Nelson Chamisa nguye osaphethe isikhundla sikamongameli ngoba ukukhethwa kwakhe kwenziwa kulandelwa isisekelo sombuso lanxa bekhona abangavumelani lakho abagoqela uNkosazana Thokozani Khuphe.

Okumangalise intathelizindaba yikuba lumhlangano wenzelwe e Anglican Cathedral Hall hatshi esigodlweni salelibandla ese Harvest House.

Embikweni wakhe kokwenzakala emngcwabeni kobengumkhokheli waleli bandla umnumzana Morgan Tsvangirai, okhokhela uhlangothi lwezomvikela wenkokheli yebandla, umnumzana Giles Mutseyekwa, wethule ngasekutholile kudaba lokutshaywa kuka Nkosazana Khuphe labanye bakhe.

Abebandla leli bathethe lelithuba ukuxolisa kuMaKhuphe labanye bakhe ngokwenzakale eBuhera lapho abahlukunyezwe khona beze emngcwabeni kaTsvangirai eHumanikwa Village.

Osaphethe isikhundla sokuba ngumkhokheli walelibandla, uChamisa utshele umhlangano lentathelizindaba, e Anglican Cathedral Church, ukuba abazatholakala belomlandu wokukwenze lokho, bazojeziswa kabuhlungu.

Okusekelwe ngumsekeli wesikhulumeli seMDC-T unkosazana Thabitha Khumalo. UMaKhumalo utshele iStudio 7, ukuba kuzomele kucwayisiswe ngokugcweleyo okwenzakale eBuhera, zazakale izigangi ezatshaya uMaKhuphe.

Inkokheli eyatshaywa kabuhlungu emngcwabeni kaTsvangirai babalisa umsekeli webandla unkosazana Khuphe, obona ngezokuhlelwa kwenhlelo ebandleni leli, umnumzana Abednego Bhebhe, ummeli weTsholotsho, eMatebeleland North, unkosikazi Lwazi Sibanda, obeyisikhulumeli sebandla umnumzana Obert Gutu lonobhala jikelele umnumzana Douglass Mwonzora.

Lanxa inengi lenkokheli yalelibandla ingene lumhlangano, ubengekho uMaKhuphe, uBhebhe kanye lonkosikazi Sibanda lanxa omunye wabamunyu ngodaba lokukhethwa kuka Chamisa ukuba ngosaphethe isikhundla sika mongameli, umnumzana Douglass Mwonzora, uEngineer Elias Mudzuri, bebekhona. UGutu, uhle waphuma kulelibandla, ngemva kwalesi sihlekalo sokutshaywa kwabo, eBuhera.

Udaba lokwenzakala kuMDC-T siluphiwa nguMavis Gama
please wait

No media source currently available

0:00 0:04:21 0:00

Facebook Forum

XS
SM
MD
LG