amalinks wokungena

Breaking News

IMelika Iqhubeka Iphathisa Ezemfundo eZimbabwe


Bruce Wharton
Ummeli weMelika eZimbabwe umnumzana Bruce Wharton uveza ukuba uhulumende wakhe uzaqhubeka ephathisa uhulumende weZimbabwe kunhlelo zemfundo lanxa lokhe kulokufuthelana phakathi kwamazwe womabili ngoba bungebuhle ubudlelwano phakathi kukahulumende wakhe loweZanu Pf osanda kungena ebukhosini.

U Wharton uveze lokhu ngesikhathi ekhulumisana lentathelizindaba embukiswemi wamakolitshi alitshumi lasitshiyagalombili emfundo yaphezulu, alamalunga awo avele emazweni abalisa ele Melika, Canada kanye le Spain owenzelwe esikolweni se Prince Edward e Harare ngoMvulo.

Edabeni lokufuthelana osekuseMozambique ,u Wharton uthi uhulumende wakhe ukhathazekile ngokwenzakala kulelo lizwe lapho abebandla leRenamo elikhokhelwa ngumnumzana Alfonso Dlakama selihlamukele uhulumende lihlasela uzulu kanye lendawo zebutho likahulumende.

Kuthi ummeli wakwele Canada obesemkhosini munye, unkosikazi Lisa Standelbauer,utshele intathelizindaba ukuba uhulumende wakhe uhlezi ephathisana leleZimbabwe kusukela ilizwe lithola uzibuse ethi kodwa selunciphe kancinyane lolusizo lwezemfundo lanxa ukengezwani phakathi kwamazwe womabili lokhe kungakalungi kangako.U Standelbauer uveze ukuba mahlanu amakolitshi alamalunga aze embukisweni lo owenzelwe e Prince Edward.

Phakathi kwalabo abaze kulombukiso wamakolitshi emfundo yaphezulu kanye lamaUniversities, kulamalunga avele e Agnes Scott College etholakala e Atlanta,e Georgia, eyabesifazane njalo kungokwakuqala ukuza embukisweni waloluhlobo.

Umsekeli womkhokheli kuhlangothi lwezokutholisa izifundi indawo kule ikolitshi, unkosikazai Laura Martins utshele intathelizindaba ukuba injongo yabo yikuthuthukisa abesifazane ukuba balithole ithuba lokuphatheka kuntuthuko yelizwe ngkuthola lula imfundo yaphezulu.

Umkhokheli wesikolo lapho lumbukiso ubusenzelwa khona ese Prince Edward, umnumzana Agrippa Sora, uthi leli kulithuba elihle lapho izifundi seSecondary ezithola ithuba lokuzakuzwa phezu kokuba bangenze njani ukuba bayefunda kulamazwe abalisa iMelika, Spain le Canada.

USora ukhuthaza abamaUniversities akuleli labo ukuba baphatheke emibukisweni efana lalo owenziwe lamuhla ukuze izifundi zazi ngokudingakalayo ukuze isifundi sithole indawo ukuyafunda kulawo makolitshi.

Inengi lezifundi ezize embukisweni lo owenzelwe e Prince Edward Boys High School, kuyileziyana, ezivela ezikoleni lapho okwakufunda abamhlophe kuphela ngesikhathi ilizwe lingakatholi uzibuse ebe zithiwa ngama Group “ A Schools ”.
XS
SM
MD
LG